Serchhip bial by-election neih turah Congress-in candidate an nei dawn

Mizoram Pradesh Congress Committee (MPCC) president Dr Lal Thanhawla chuan, Ser­chhip biala Assembly by-election buatsaih turah an party-in candi­date an neih ngei dawn thu a puang.

MPCC President hian nimin khan Lal Thanhawla Auditorium-ah thu sawiin, Serchhip bialtu MLA Lalduhoma bàn a nih avanga Serchhip biala by-election neih tur chu an party-in an chuh ngei dawn thu a sawi a, "Kan chak bawk ang. A ding tur ka hual ru tawh a, ṭha dang an awm pawhin a la theih tho, kan hotute thu thu a ni. Candidate ṭha tak, chak tak kan dah dawn," a ti.

MNF MLA-te'n Lalduhoma an hêk thu sawiin Lal Thanhawla chuan, "A hêka hêk kha ṭha kan ti lo a, thil a tisual em tih pawh hriat hmain a thlavâng kan hauh a ni. Speaker-in dan a bawhchhe ngei tia a bàn hnuah chuan a thlavâng hauh a ṭulna ka hre tawh lo, politics leh mihring tak pawhin," a ti a; dan bawhchhiate chu an thlavâng hauh tur a nih loh thu a sawi.

MPCC President sawi danin Serchhip bialin Congress MLA chak tak leh ṭha tak an nei thuai dawn a, chumi atan chuan Congress party-in ruahmanna an siam fel vek tawh.