NEC secretary Ram Muivah-a'n Larsap, minister leh CS a kâwm

North Eastern Council (NEC) secretary Ram Muivah chuan Nilaini tlai khan Governor Lt.Gen. Nirbhay Sharma a kâwm a, nimin khan School Education minister H Rohluna leh chief secretary Lalmalsawma a kâwm leh. Larsap chuan autonomous district council (ADC)-te ngaihsak an ṭul thu a sawi.

Ni hnih cham tura Mizorama lo zin NEC Secretary chuan Larsap hnenah Mizoram a rawn tlawh chhan a sawi a; NEC budget len zawng, fund pek chhuah dan kalhmang, NEC-in a dah pawimawh bikte leh an hmalak dante hrilhin, "Theihtawp kan chhuah chung pawhin kan chhût lâwk ang leh beisei aia tlem zawk sum kan hmuh vanga hmalakna tam tak tihpuitlin theih a ni lo hi pawi kan ti hle," a ti.

Ram Muivah chuan, NEC-in hmarchhak mite tana theihtawp an chhuah mek thu sawiin, "Border Roads Organisation chauhin a thawh theih project hmarchhak biala hmun pakhatah kalpui mek a ni a, chutiang project chu Mizorama BRO-te pawhin an thawk ve thei a ni," a ti. Larsap chuan sawi zuiin Mizorama BRO-te a rang lama hma laktir an nih tur thu a sawi.

Governor chuan, NEC chu hmarchhak bial mite tan NITI Aayog tênau a ni tih sawiin, "NEC-in Mizoram tan hmasawnna ruhrel tam tak a dinsak tawh a ni," a ti a; Mizorama ADC pathumte chu district hnufual an nih avangin ngaihsak a ṭul thu NEC Secretary hi a hrilh.

NEC Secretary hi nimin zing khan Aijal Club-ah School Education minister H Rohluna nen an inkâwm a; minister chuan Education Reforms Commission (ERC) tihhlawhtlinna atana sum mamawhte a sawipui.

ERC rawtna zingah infrastructure tihhlawhtlinna atan sorkarin sum a mamawh sawiin, H Rohluna chuan, "Sum mamawhte hi NEC hnena thlen a ni tawh a, NEC pawhin a thawh khatna atan cheng vbc. 14 chu ngaih pawimawh turah a dah," a ti. Cheng vbc. 14 chu pek chhuah a la nih loh avangin pe chhuak turin NEC Secretary a ngen a ni.

NEC Secretary chuan, sorkar kum kal mekah NEC-in budget a neih tlem thu leh Union Minister hnenah tipung tura an ngen hnuah tlemin a pung leh tih a sawi a; ERC atana sum mamawh chu School Edcuation Minister ṭawiawmtu Planning Secretary hnenah priority list-a dah tur leh thehlut nawn turin a hrilh.

Ram Muivah hi nimin chawhma lam khan chief secretary Lalmalsawma nen an inkâwm leh a; NEC-in sum pek chhuah a harsat chhan chu Central aṭanga an sum hmuh tur aia tlem zawk an dawn vang a nih thu a hrilh. Chief Secretary hi Mizoram sorkara secretary-te'n an ṭawiawm a ni.