Champhai dist. khaw tinah sikul din

SSA Mission Champhai District Education Committee chu nimin khan DC conference hall-ah an chairman Vanlalngaihsaka, Cham-phai DC hoin an
ṭhu-khawm a; Champhai district-a khua zawng zawngah sikul din a nih tawh thu tarlan a ni.

Vanlalngaihsaka chuan, sorkarin zirna lama hmasawnna kawngah mipuite zângkhai zawk nan kawng hrang hrangah puihna leh sum sên tam ngai loa zirtirtute training pe kim vek kaihhuaina hnuaia zirna pe tura ruahmanna siam a nih thu a sawi a, "Enrolment a tam theih nan result lamah hmasawn zel tura hmalak a ṭul," a ti.

Meeting-a tarlan danin, kum 2015-16 chhung khan Champhai district SSA Mission hnuaiah zirna sikul awm lohna khua zawng zawngah sikul hawn vek a ni a, zirtirtu 188 dah a ni. Vohbik naupang 993 enkawlna turin December 2015 thleng khan Rs. 10,77,540 hman a ni.

Champhai district-ah hian sikul 276-ah zirlai naupang 16,163 hnenah chawchhun pek ṭhin a ni a, chaw chhumtu (cook) 555 rawih a ni. Cook hlawh tur a hranpain sum dah a ni lo a, sum hmuh dan azira pek a nih thin avangin sum hmuh veleh pek ṭhin ni mah se, dawn tlai vanga hlawh inpek har cháng a awm ṭhin.

BPL leh AAY chhung-kuaa mi zirlai hmei-chhiate tan awmna tur residential hostel, seat 50 awmna Champhai Vengthlang Middle School compound-ah kum 2006 khan din a ni a, tun thlengin ṭangkai taka hman a ni. Hostel-a awm dilte chu interview hmanga lak a ni a, zirna pangngai bakah puan ṭhui zirtir an ni.