Serchhip district-a hnathawhte thlirho

Serchhip District Vigilance and Monitoring Committee chu nimin khan an chairman CL Ruala, Lok Sabha MP leh co-chairman Ronald Sapa Tlau, Rajya Sabha MP hoin an ṭhukhawm.

CL Ruala chuan, sorkar hnathawkte chu mipuite hnaiha thawktu leh sorkar kutkê ber an nih avangin an ṭha-hnemngaihna tel lo chuan hmasawnna a kal tak tak thei lo tih a sawi a, theihtawp chhuaha ṭan la zel turin a chah.

Ronald Sapa pawhin sorkar hnathawkte chu ṭha taka hna an thawh theih nan an chhia leh ṭha hriatnate hmang uluk turin a chah a, "Sorkar laipuiin scheme duante hi India ram puma inang tlanga hman tura duan a nih laiin, kan ram leilung, sik leh sa leh nunphung mil lo a awm ṭhin a, hetiang thilah hian kaihhruaina dan siam ang lo deuh hleka her rem a nih pawhin hriatthiam theih a ni," a ti.

Meeting-a tarlan danin, Serchhip district-ah hian MGNREGA hnuaiah kum 2015-16 kal mekah ni 37 chhung job card neite tan inhlawhna siam a ni tawh.

IAY kaltlangin kum 2015-16 chhungin chenna in 34 sak a ni tawh a, chungte chu Serchhip RD Block-ah 22 leh East Lungdar Block-ah 12 a ni. National Social Assistance Programme hnuaiah tar pension (IGNOAPS) dawngtu mi 1,567 an awm a, pension sum chu bank kaltlanga pek ṭhin a ni.