KHAWTHLIR

Chapchar Kut

Chapchar Kut 2016 Organising Committee chu nimin khan Art & Culture minister R Romawia hoin a pisa-ah an ṭhukhawm a, kut hman dan tur an lo duan lawk thlir hoin, tlem tihdanglam a nih hnuah pawm a ni. Meeting-a tarlan a nih danin, Assam, Meghalaya, Tripura leh Manipur-a Mizo hnahthlakte kut hmang tur hian an lo kal dawn.

Hri danna sawiho

Lunglei District task Force on Immunisation chu nimin khan an chairman Abhijit Vijay Chaudhari, Lunglei DC hoin a pisaah anṭhukhawm a, February 23-25, 2016 chhunga National Immunisation Day second round kalpui dan tur an sawiho.

Lehkhabu

All Mizoram Farmers’ Union buatsaih leh Prof. H Lalramnghinglova ziah, 'Green Revolution & Mizoram Sloping Agriculture Changkham Technology' tih leh Dr Chawngkhuma Chawngthu ziah, '1 Minute Vietnam vs Mizoram' tihte chu nimin khan NLUP conference hall-ah Agriculture minister R Lalzirliana'n a tlangzarh.

Thiin chhar

Thanhleia (47) s/o Saptawna, Lunglei Chanmari chu February 17, 2016 chhun dar 11:30 vel khan Lunglei Civil Hospital hnung lama Tarmita Khawthlir bul khâmah thia hmuh a ni. Thu dawn danin, Thanhleia hi February 14, 2016 aṭangin a awmna chin hriat a ni lo a, zawn a nih hnuah nimin khan thiin an chhar ta a ni.

Mi 1,376 admit

January 2016 chhung khan Aizawl Civil Hospital-ah mi 31,878 an inentir a, mi 1,376 admit niin, mi 62 an thi a, nau piang 410 an awm thung.

Model village

Minister John Rotluangliana leh minister of state Lalrinmawia Ralte-te hoin nimin khan Mamit DC conference hall-ah Mamit district-a MLA-te'n model village atana an thlan - Kanhmun, Reiek leh Dapchhuah khuate tihhmasawn dan tur an sawiho.

Zoram Thar din chhan sawifiah

Zoram Thar hruaitute chuan nimin khan Aizawl Press Club-ah thuthar thehdarhtute an kâwm a, an din chhan leh an thil tumte an puang.

Zoramthar president Rev.Dr Zaichhawna Hlawndo sawi danin, Zoram Thar hi February 13, 2016-ah din a ni. An innghahna chu Pathian (Pa leh Fapa leh Thlarau Thiang-lim) niin, an thil tum chu 'Pathian lal ram thar din' tih a ni a, engkimah Pathian dah hmasak an tum.

Zawhna chhangin Rev.Dr. Zaichhawna chuan, democracy rama awm kan nih avangin an thil tum tihlawhtling tur chuan inthlan chuh vete pawh a ngaih tur thu a sawi a, "Kan politics hi Pathian politics a ni lo a, India rama awm tho si hian milem bia hnuaia awm loin a awm theih," a ti. Zoram Tharah hian vice president pahnih awmin, R Vanlalzauva leh Lalsiama Fambawl te an ni a, general secretary chu prof. H Lalramnghinglova a ni.

Khawzawl Group YMA conference

Khawzawl Group YMA chuan February 16, 2016 aṭang khan Ra-bung YMA Hall-ah con-ference an hmang a, nimin khan parliamen-ta-ry secretary TT Zothan-sanga'n a hmanpui.TT Zothansanga chuan, "Taimakna leh thuawihna kawngah Mizo ṭhalaite’n zirtur kan ngah hle a, eng hna pawh thawk se la, taimakna leh teirei peihna an neih a ṭul a ni," a ti. Khawzawl Group YMA conference hi nizan khan a ṭiak a ni.