Zirtirtu awm loh vangin Lungchhuan P/S khâr

Lungchhuan Primary School-ah zirtirtu indaih lohna vangin zirlaite'n harsatna an tawk a, zirtirtu indaih loh vang leh zirtirtu dah belh phût vangin he sikul hi February 17, 2016 aṭang khan khâr a ni.

Tuichangral Zirlai Pawl (TCZP) thuchhuah chuan, Lungchhuan P/S-ah hian zirtirtu class la tur an awm lo tih sawiin, "Hemi chungchangah hian sorkarin a mawhphurtu zawng chhuak a, zirlai naupangte'n zirna mumal tak an dawn leh theih nana hma la nghal turin kan sorkar kan phût a ni," an ti.

TCZP tarlan danin, Lungchhuan P/S-ah hian zirtirtu pakhat chiah a awm a, zirtirtu awmchhun pawh chuan eng emaw harsatna vangin casual leave a la a; chuvang chuan February 17 aṭang khan class la tur zirtirtu an awm lo a, sikul khâr a ngaih phah ta a ni.