MNF-in ramhnuai rilru an la paih lo - Lal Thanhawla

MPCC chuan nimin khan kumin atana Congress Bhavan khârna inkhawm Lal Thanhawla Auditorium-ah an buatsaih a; an president Dr Lal Thanhawla chuan, MNF-in ramhnuai rilru an la paih loh thu a sawi.

Dr Lal Thanhawla chuan, MNF-ah mi ṭha tak tak awm mah se, an pute an la awm tlat avangin duh angin an kal thei lo tih a sawi a, "An hotute hian ramhnuai rilru an la paih lo. Mi thiam leh Pathian ṭih mi pawh awm mah se, an duh angin an kal thei chuang lo ang," a ti.

MNF-in autonomous district council (ADC) mipuite hmangaihna leh duhsakna an nei lo nia sawiin Lal Thanhawla chuan, "State-ah MNF-in sorkarna an chan chhung chuan ADC-ah tu pawh sorkar se, an rilru a thlamuang ngai lo ang," a ti a; MNF chu an rilru a ṭha lo niin a sawi.

MPCC President chuan, MNF-in sorkarna an chan veleh MADC-a Congress sorkar pawh namthlûk an tum nghal tih a sawi a, "Ka hnenah an lo kal a, ka lo chhan theih tawh si loh avangin, MNF nih an duh si loh chuan state sorkarin a khawih ngam lohna atan MNF-te pú BJP zawm turin thuràwn ka pe a ni," a ti.

MNF party chuan an púte BJP tlawnin Citizenship Amendment Bill pawh lâwm takin an pharpui tih sawiin Lal Thanhawla chuan, "MADC-a Congress MDC-te'n an duh vang ni loin, mipui hmangaihna nei miah loa nghaisak an nih avangin BJP an zawm a ni," a ti a; MNF chuan MADC-a BJP sorkar chu an khawih ngam loh tur thu a sawi.

MPCC President chuan, India ram chu democracy ram a nih avangin Mizorama sorkarna an chanin mipui siam sorkar zah takin an enkawl ṭhin niin a sawi a, "MNF sorkar chhung chuan LADC-ah pawh khan sorkar ila, sorkar tûk aṭangin tihchhiat leh an tum tho dawn a ni," a ti.

Mamit bialtu MLA H Lalzirliana te Tut luia sangha bomb-a puh an nih chungchangah Lal Thanhawla chuan, "Ruling party pawh ni se, mi dik lo chu hrem zel a ṭha. Mamit bialtu MLA-te hi an thlavâng pawh hauh chi a ni lo," a ti a; khawtlangin an humhalh lai bomb hmanga beih chu ram hruaitu tan thil tih chi a ni lo tih a sawi.

Congress Bhavan khârna inkhawm hi MPCC treasurer Zodintluanga Ralte-in a kaihruai a, general secretary (GAD) Joseph Lalhimpuia'n an party dinhmun hrang hrang a tarlang a ni.