MZU UG gold medalist-te chawimawi

Aizawl City College Joint Students' Union (ACCJSU) chuan nimin khan MZP Conference Hall-ah ACCJSU Assembly an hmang a; Mizoram University-a under graduate final exam-a gold medalist-te hnenah chawimawina an hlan.

Zirlai chawimawina huna khuallian Lalrinawma, Assembly deputy speaker chuan, mawhphurhna hlen loh vanga tawrhna a tam tih sawiin, "Kan ramin a mamawh em em chu mawhphurhna hlentute a ni. Khawi hmunah pawh awm ila, mawhphurhna hlentu kan mamawh a, mawhphurhna hlentu nih i tum ṭheuh ang u," a ti.

Lalrinawma chuan, tuna zirlaite leh ṭhalaite chu hna hrang hrang pawimawh tak tak thawkin hmun hrang hrangah an la awm dawn tih sawiin, "Chutih hunah chuan mi tin hi hlutna hmun leh hun nei ṭheuh kan ni tih hriain, min dawrtute kan hmachhawn tur a ni. Ṭha berah inpawm la, eng hna pawh thawk la, a ṭha ngei ngei ang," a ti a; mahni inngaisanga inhlut turin zirlaite a fuih.

Inkhawm hi ACCJSU vice president C Lalhmingsanga'n a kaihruai a, ACCJSU president Lalruatpuia leh MSU president Vanlalliana Khiangte te pawhin thu an sawi.

ACCHJSU hian MZU under graduate examination 2020-a Arts, Science leh Home Science-a mark hmu sang berte hnenah chawimawina thuchei leh sum an hlân a; chawimawina dawngtute chu - Arts-ah Samuel Malsawmzuala, PUC, Science-ah JH Zorinpuii, PUC leh Home Science-ah Lalringzeli Renthlei, Zirtiri Residential Science College-te an ni.