Lok East Policy-ah hlâwkna Hmuh tur a la awm lo: Hawla

Chief minister Lal Thanhawla chuan February 18 zan khan New Delhi-ah thu sawiin, sorkar laipuiin kum 20 chuang Look East Policy a kalpui tawhah hlâwkna hmuh tur a la awm lo niin a sawi.

New Delhi-a Ministerial Session of 8th Delhi Dialogue on Look East Policy neihah CM Lal Thanhawla chuan, "Hmarchhak bial hian kawng tinrengah hmasawnna ruhrel a tlâkchham avangin kum 20 chuang Look East Policy kalpui tawhah hlâwkna hmuh tur a awm lo," a ti.

Look East Policy-in ASEAN ramte nena inkungkaihna siamin, hmarchhak state-te sum leh pai leh ei leh bara an dinhmun nasa taka a vawrh chhoh theih thu sawiin Lal Thanhawla chuan, "Hei hian a leilung hausaknate awmze neiin a hman ṭangkaitir thei a ni," a ti a; hmarchhak state-te chuan tui leh khawmuala inkalpawhna ṭha an neih a ṭul thu a sawi.

Chief Minister chuan, hmarchhak biala land custom station 17 awm mekte a ruala motor lian pahnih tal kal theihna tura kawngpui siam ṭul a tih thu te, Manipur-a Moreh te, Arunachal Pradesh-a Pangshu Pass leh Mizorama Zokhawthar panna kawngpui ṭha tak siam a ṭul thute leh, Kaladan Multi Modal Transit Transport system a hun taka zawh a pawimawh thute a sawi a ni.

Lal Thanhawla chuan, Bairabi leh Sairang inkara rel kawng siam zawh thuai a nih theihna turin chak taka hmalak leh KMMTTP pawh tura Lawngtlai thleng rel kawng siam turah chak taka hmalak nise a duh thu a sawi a, "Lui awm ang angte pawh hman
ṭangkai ni se," a ti.

Aizawl, Imphal, Guwahati leh Agartala-ahte bungraw phur chi thlawhtheihna an ṭum theihna tur zawn ṭha a tih thu sawiin, CM chuan, "Dhaka, Thimpu leh Myanmar-te leh hmarchhak bial inkara thlawhtheihna thlawhtir theih ni se," a ti a; chumi atan chuan Aizawl, Imphal leh Agartala thlawhna ṭum hmun tihchangtlun a ṭul thu a sawi.

Sawihonaah hian Association of South East Asian Nations (ASEAN) ram leh India sorkar aiawhte an tel a ni.