DoNER Secretary Lunglei leh Lawngtlaiah

Development of North Eastern Region (DoNER) secretary Naveen Verma chuan, nimin khan Lunglei leh Lawngtlai a tlawh a, DoNER sum hmanga hna thawh mekte a hmunah a enfiah.

DoNER Secretary hian Lunglei tlawh hmasain, Lunglei DC Abhijit Vijay Chaudhari hoin sorkar hotute'n an lo hmuak a, Lunglei Circuit House-ah DoNER hnuaia Lunglei district-a project kalpui mekte an sawiho. Naveen Verma hian Lunglei Chanmari-a indoor stadium sak mek a enfiah a, hna thawh dan lungawithlak an tih thu a sawi.

Naveen Verma chuan, sorkar laipuia ministry tinin an budget aṭanga 10 chu DoNER-ah an chhûng lut tih sawiin, "Sum tlingkhawm aṭanga sorkar kum khat chhunga DoNER-a sum awm thei zat chu vbc. 2200 a ni," a ti a; DoNER chuan Non-Lapsable Central Pool of Resources (NLCPR) hmangin hmarchhak bialah project leh scheme hrang hrang atan sum a pe ṭhin tih a sawi.

DoNER Secretary chuan, sorkar department tinte chu project siam chak a, an hnenah thehlut turin a hrilh a, "Mipui chanvo tichak lehzual turin DoNER chuan website-ah 'social audit window' a buatsaih thar a, smartphone nei tu pawhin project kalpui mekte thla lain, fakna leh sawiselna an post thei reng a ni," a ti.

Lawngtlaiah chuan DoNER Secretary hian DC conference hall-ah sorkar official-te leh autonomous district council (ADC) pathuma hotute a kâwm.

Naveen Verma chuan, India sorkar chuan hmarchhak state-te mamawh dik tak thiamna leh theihna pek a duh tih sawiin, "A chhunga chengte theihna tihmasawn tura ruahmanna siam thiam a pawimawh. Cultural dress mawi tak tak an tahte hi DoNER-in India ram khawpui lian zawka zawrhsak a inhuam a ni," a ti.