MNF-in State Day hman loh pawi an ti

MNF president Zoramthanga chuan, Mizoramin kum 29 chhung a lo lawm tawh Mizoram State Day, Congress sorkarin a titawp chu mak a tih thu leh pawi a tih thu a sawi a, "Lal tláwm tur thinlung tihmâwlin a awm mek a ni," a ti.

Nimina Mizo Hnam Runa inkhawmah thu sawiin, Zoramthanga chuan, "Mizoram State Day, February 20-a hman ṭhin hi Mizo tam tak chuan India Independence Day leh Republic Day ang bawka pawimawhah kan ngai a, ṭhenkhat phei chuan pawimawh zawka kan ngaih hial a ni," a ti a; Mizoram leh hnam tana ni pawimawh ber pakhat, chhan leh vang awm loa Congress sorkarin a hnâwl chu Mizoram leh hnam zah lohna lian ber nia an hriat thu a sawi.

MNF President chuan, "Mizoram State Day hi state holiday aṭanga paih bo a ni hi ṭha lo kan ti a, kan sorkar leh veleh Mizoram State Day hi hman chhunzawm a ni ang," a ti a; Congress sorkar chu kawng hrang hrangah thil dik lo an tih avangin an rorel a fuh hlei thei tawh lo niin a sawi.

MNF vice president Dr R Lalthangliana pawhin thu sawiin, Lungchhuan Primary School-ah naupang zirtirtu tur an awm loh avanga sikul khâr a ni leh Thingsaiah zirtirtu dah belh phûta sikul zawng zawng khâr a ni chu pawi a tih thu a sawi a, "School Education Minister leh bialtu MLA hnena an thlen tawh chunga ngaihsak a ni lo hi sorkar mualphona a ni," a ti.

R Lalthangliana chuan, MNF kum 10 a sorkar chhungin Mizorama sikul awm lohna khua zawng zawngah sikul thar an din vek thu sawiin, "A thlawnin zirlaibu kan sem a, Education department-ah thawktu 4,910 kan la thar a. Congress sorkar hmasain an hlankai theih loh thawktute chu selection grade-ah kan hlankai vek a, P/S leh M/S-ah Hindi zirtirtu kan pe vek a ni," a ti. P/S 823, M/S 526, H/S 300 building an sak thar thu a sawi bawk.