Health Minister conference-ah Thanzara

Nimin khan New Delh-ah Health Minister's Meeting buatsaih a ni a; Mizoram Health minister Lal Thanzara chuan Mizorama AYUSH hmalakna leh hmachhawpte a sawi.

Lal Thanzara chuan, kum 2016-17 chhunga fund-te a hun taka pe tur leh medical plant chungchangah Mizoram ngaihsak lehzual tur leh, National Health Mission hnuaia AYUSH doctor leh allopathy doctor-te hlawh inanga pe turin a ngen.

State sorkarin AYUSH a din tirh aṭanga tun thlenga a dinhmun sawiin Health Minister chuan, "District tinah AYUSH hospital a awm a, Thenzawlah khum 50 awm theihna tur AYUSH Hospital hawn a ni. He hmun hi AYUSH Medical College-ahte pawh la hman theih tura beisei a ni a, a puitlin theihna atan sorkar laipuiin min puih a ngai," a ti.

Tun dinhmunah Mizoramah district hospital leh community health centre hrang hrangah OPD/IPD 20 a awm a; AYUSH awmna hospital-ah chuan OPD-a inentir tura kal zingah 12% chuan AYUSH doctor-te an pan a ni.