Minister John-a'n lirthei chhiah a sawifiah

Transport minister John Rotluangliana chuan, lirtheia lifetime tax lak zat chu an duh duha tihdanglam ngawt theih a ni lo niin a sawi.

Transport Minister hian nimina Congress Bhavan-a inkhawmah thu sawiin, "Lirtheia lifetime tax 6% lak tur hi state list ni mah se, dan hnuaia kal a nih avangin mahni duh duhin kan ti thei lo. Motor Vehicle Act leh rules a awm a, kan duh duhin kan ṭhuai ngawt thei lo. Hmana tih ang khan 'ni mai se' a tih ngawt theih tawh loh a ni," a ti.

John Rotluangliana chuan, India ram pumah dan thar hman tur a nih thu sawiin, "Motor Vehicle Act hnuaia lifetime tax hi October 2013-a Transport Development Council-in an rel a ni a, India ram puma hman tur a ni," a ti a; dan thar hmang tur hian Mizoram Vehicle Act, 1996 siam-
ṭhain, Assebly session November 2015-a neihah pawm a nih thu a sawi.

Transport Minister sawi danin, Mizoram ramah chuan a rate hniam thei ang berin lifetime tax lak a ni a; miin lirthei a leiin VAT an pek hmain chhiah atan motor man zat aṭanga 6% a pe tur a ni a, chu chu rate hniam ber a ni.

John Rotluangliana chuan, state dangah lifetime tax chu 2% leh 3%-te an la nia sawi chu thu dik lo nia sawiin, "Hetiang lak theihna dan a awm lo. 12% te, 14%-te state ṭhenkhatah chuan an la zawk a ni," a ti.