Apollo-ah robot hmangin cancer zai thei

Apollo Gleneagles Hospital, Kolkata chuan lú leh ngháwng vela cancer neite robot khawl hmangin nikum aṭang khan an zai thei tih an puang.

Apollo Gleneagles Hospital, Kolkata-a chief surgeon leh senior consultant Dr Santanu Panja chuan nimin khan Aizawl Press Club-ah thuthar thehdarhtute kâwmin, an damdawi-in chu India ram khawchhak lama damlo enkawlna sang ber pe theitu an nih thu a sawi a, "Kan damdawi-ina surgeon, anaesthetist, medical oncologist, radiotherapist leh rehabilitationist-te'n lú leh ngháwnga cancer veite enkawl chi kimin kan enkawl thei," a ti.

Dr Santanu Panja chuan, Apollo Hospital chu India khaw-chhak lama laser leh robot hmanga inzai theihna hmun hmasa ber a nih thu a sawi a, "Cancer enkawlna leh tihdamna liau liau kum ruk kan kalpui tawh," a ti. Laser leh robot hmanga inzainaah chuan thisen chhuak a awm mang lo a, taksa pawnláng zai a nih loh avangin zaina hnûhmá a awm lo tih a sawi.

Dr Santanu Panja chuan, "India hmar-chhak lamah chaw kawng cancer leh ka chhung cancer hi al (salt) an ei tam bakah, kuhva an ei nasat vangin a tam hle a, "Zu leh zûk leh hmuam ti nasa tan chuan cancer vei a awlsam bik. Cancer vei loh nan ngheia nun dan siamṭhat a pawimawh," a ti a; cancer chu a tìr têa hmuh chhuaha enkawl a pawimawh thu a sawi.

Zawhna chhangin Santanu Panja chuan, robot hmanga inzaina an kalpui tawh avangin cancer an enkawlte pawh chemotherapy tih a ngai ve tawh lo tih a sawi a, "Zai man a sang bik chuang lo. Taksa páwn lam kan zai thler tel lo a, ka chhung aṭangin a tih vek theih a ni," a ti.

Apollo Hospital hi kum 1983-ah Dr Prathap Reddy-a'n Chennai-a a din a ni a, hriat an hlawhna ber chu lung (heart) ná zai leh enkawl a ni a, lung ná vawi 1,60,000 an zai tawh a ni.