MINECO Multipurpose Hall hawng

Urban Development and Poverty Alleviation (UDPA)-in an sak thar, MINECO Multipurpose Hall chu nimin khan UDPA changtu deputy chief minister Tawnluia'n a hawng.

Tawnluia chuan, National Urban Livelihoods Mission (NULM) aṭangin Mizoramah self help group 1,440 din a nih tawh thu sawiin, NLUM hmangin khawpuia mirethei chhungkaw nute an inpuih tawna tur thawhhona ṭha siam a nih thu a sawi.

Dy Chief Minister chuan, Covid-19 hripuiin khawpuia cheng ni tin inhlawhte a nghawng na zual tih sawiin, chu'ng mite ṭanpuia an dinhmun tihziaawm nan UDPA-in ṭan a la niin a sawi a; Aizawla BSUP-a cheng leh khawpui dang 22-a chhungkaw 3,186 hnenah kumin April thlaah ṭanpuina sum bakah ni tin mamawh leh damdawite an pek thu leh, DAY-NULM hmangin khawpui 23-a chhungkaw 2,600 hnenah cheng nuai 26 sem a nih thu a sawi bawk.

Multipurpose Hall hi Mizoram sorkar sum cheng nuai 350 séngin Risors Associate Services-in an sa a, October 2018-ah sa ṭanin, August 2020-ah sak zawh a ni. A hawnna inkhawm hi UDPA director H Lianzela'n a kaihruai a, MLA Dr Vanlalṭanpuia pawh a tel.