Lungleiah RT-PCR khawl dahna peih vat turin LDCC-in sorkar phût

Congress Legislature Party (CLP) leader Zodintluanga Ralte-in a pek Civil Hospital, Lungleia hman tur swab sample endikna, RT-PCR khawl dahna tur peih vat turin Lunglei District Congress Committee (LDCC) chuan Mizoram sorkar an phût.

Lungleia Congress party hruaitute chu nimin khan Lunglei Civil Hospital medical superintendent Dr SR Ngurchamliana pisaah an léng a; Zodintluanga Ralte-in RT-PCR kháwl a pek hman loha awm reng chu sorkarin hman a tum em tihte leh a kaihhnawih thil dangte zawtin an sawipui a ni.

LDCC thuchhuah tarlan danin, Dr SR Ngurchamliana chuan, RT-PCR khawl chu hmang turin a hmanrua (cabinet) an nei tawh tih a sawi rualin, tuna building awm saah chuan expert team-te'n dah a him loa an ngaih avangin a dahna tur an neih loh thu a sawi.

Medical Superintendent chuan, RT-PCR khawl dahna tur an ruahman a, plan & estimate an siam tawh chu Aizawlah an thawn tawh thu a sawi a, "HFW Secretary kutah a awm tawh a, hei hi November 25, 2020-ah an hmu tih lehkha kan dawng," a ti.

Lunglei Civil Hospital-a RT -PCR khawl dahna tur ruahman mek a ni chu a lawmawm an tih thu sawiin LDCC chuan, "A tak a hman theih hun tur tlumtêa thlira thlir a ngai dawn tihna a ni a. Sorkar official-te'n ruahmanna an siam hi a chak thei ang bera kalpui a, mipui himna ngai pawimawh ber turin sorkar kan ngen a ni," tiin, chak zawka bawhzui turin Mizoram sorkar an phût.

LDCC chuan, Covid-19 dona leh mipui hriselna tura kawng hrang hranga thawktute inpekna chu chhuanawm an tih thu sawiin, "An thiamna leh theihna hmang thei tura hmanraw ṭha pek hi sorkar mawhphurhna liau liau a ni," an ti. Lungleia doctor indaih lohna awm mek tiziaawm tura ṭan la zel turin Health Minister an ngen tih an sawi bawk.