Sorkarin NLUP a kalpui hnuah Cocoon hralh zat a pung

Sorkarin Sericulture depart-ment-ah kum 2012 aṭanga NLUP a kalpui aṭangin pangang vulh thlangtu chhungkaw 2,206 an awm tawh. Sericulture depart-ment chuan NLUP kalpui hma-in cocoon kum khatah Rs. 5,00,000 man vel an lei ṭhin laiin, NLUP kalpui hnuah kum khatah nuai 11.38 man vel an lei tawh niin an ngai.

Sericulture department hotute chuan, NLUP-a pangang vulh thlangtu zingah hlawhtlinpui an awm rualin, hlawhchhampui pawh an awm tih an sawi a; tuna an kalpui mek chu mulbery bik a nih thu sawiin, NLUP-a pangang vulh thlangtu chhungkaw 2,206 aṭangin chhungkaw 10 velin kum khatah Rs. 1,75,000 vel an la lut tawh a, hmun thuma ṭhena hmun khat vel chuan Rs. 50,000 aia tlem an la luta an ngaih thu an sawi.

NLUP hnuaiah hian pang-ang vultu Aizawl district-ah chhungkaw 755, Lunglei dis-trict-ah 347, Saiha district-ah 165, Lawngtlai district-ah 61, Champhai district-ah 328, Kolasib district-ah 202, Serchhip district-ah 211 leh Mamit district-ah 117 an awm. Tunah hian a thawh lina sum second instalment an pe mek.

NLUP hnuaia pangang vultute chu sum an pek bakah, project dang aṭangin a vulhna hmanrua leh thingtheihmu châwmna tur tui lakna leh tuizemte an pe a ni.

Sericulture department hotute sawi danin, mulbery bakah, eri (muṭih leh pángbâl ei chi), muga (nauthak leh bûl ei chi) leh oaktasar (sasaw thing ei chi)-te vulh turin an kalpui mek a; mulbery tih loh chu a la tam vak lo.

Pangang tuitirna Zemabawk-ah an din tawh a, a tui a keu aṭanga chhûtin thla khat velah a cocoon hman niin an sawi. A tui 100 a awmin a cocoon chu kg. 40-50 vel a chhuak thei a; a man to ber chi Rs. 250-a chhûtin thla khatah Rs 10,000 - 12,500 inkar vel an lei chhuak thei. Kum khatah vawi nga a thar chuan, a pangngai ho chuan Rs. 50,000 vel man an lei chhuak thei a, a hmun nei zau zualte chuan Rs. 1.75,000 vel an lei chhuak thei a ni.

Kut hnathawktute pangang cocoon chu Sericulture depart-ment-in an leisak zel a, kg. khata 400-600 awm chi chu a ṭhat ber avangin Rs. 250-in an leisak a, kg. khata 601-800 awm chi chu Rs. 200-in, kg. khata 801 leh a aia tam awm chi chu Rs. 150-in an leisak ṭhin.

Sericulture department hotute chuan, pangang khawi chu a hlâwk thawkhat niin an sawi a, "Kan thlai thar zinga Mizo pain chhipa a phurh a, Rs. 6,000 man chuang vawi khata phurh theih awmchhun a ni. A hralhnaah buaina a awm lo a, bazara ṭhutpui ngai loin engtik lai pawhin rate mumal takin department-ah hralh theih a ni," an ti. Pangang khawi chu ramngaw tihchhiat belh zel tur danna ṭha tak leh nungcha humhalhna ṭha tak a nih thu an sawi bawk.