Bungkawnah police 2 sawisak rawn

Inrinni zan zanlai pelh hnu, dar 1 vel khan police patrol duty pahnih chu Bungkawnah mipa pasarihin an khawih rawn a, a khawihtu nia hriat mi pasarihte chu nimin khan police-in an man.

Police SDPO (Aizawl South) Lalbiakzauva'n Vanglaini palai zawhna chhanga a sawi danin, police kut tuarte hi 3rd. MAP deputy commandant Lalduhthlanga leh a driver David Rodingliana te an ni a; CID Tlang aṭanga an chhuak thla chu scooter-in kawng a dâl avangin horn an pe a, mi pasarihte chuan an khawih rawn zui nghal a ni. Police pahnihte hian hliam an tuar nual.

He thil hi police-te chuan chhui zui nghalin, nimin khan police pahnih khawih rawntu nia hriat mi pasarihte chu an man a, nimin vek khan Court-ah hruai niin, Court chuan police-te'n darkar 72 chhung an kawl a phalsak.

Police sawisatu nia hriat an mante chu - C Lalremruata (24) s/o C Lalhmingliana, Peter Lalchhandama (26) s/o P Lalrinliana, F Lalrinsanga (28) Lalchamliana (L), Lalruatfela Sailo (29) s/o Lalhmingmawia Sailo, Lalremsanga (35) s/o Ngurhmingthanga, Lalrinzuala (30) s/o Thangzikpuia leh C Lalrindika (32) s/o C Lalhmingliana te an ni. C Lalrindika hi police aṭang bàn tawh a ni a, a meizang hlaptu bera ngaih a nih thu police hotute chuan an sawi.

Mi pasarihte hi IPC Section 341, 323, 353, 355 leh 34 hmangin thubuai an siamsak a ni.