KHAWTHLIR

DGP-ah kaisang

PC Lallawmsanga, IPS (1984 batch), Mizoram sorkara secretary hna chelh mek chu DGP Apex Scale-ah a kaisang a, Tamil Nadu sorkarah a awm dawn nia thu dawn a ni. Promotion order chu February 9, 2016 khan tihchhuah a ni.

Education sunday

Baptist Church of Mizoram chuan nimin khan Education Sunday an hmang a, tualchhung kohhran tinah chawhma inkhawmah hun an hmang a, thupui chu 'Thu ka pek zawng zawng che u pawm turin zirtir rawh u' tih a ni. BCM Education Sunday hi February Pathianni hnuhnung berah hman a ni ṭhin a, kuminah erawh chuan Pathianni vawi thumnaah an hmang a ni.

Thisen pe

Chhinga Vengthlang Branch KṬP chuan Central KṬP Blood Donation Calendar angin Inrinni khan Aizawl Civil Hospital tan thisen unit 36 an pe a, a petute mipa 27 leh hmeichhia pakua an ni.

Sipai hotu lo zin

GoC–in–C (Eastern Command) Lt.Gen. Praveen Bakshi chuan February 19-20, 2016 chhung khan Mizorama venhima chungchang leh ramri kâna dan bawhchhiatna thleng theite thlirin Aizawl a rawn tlawh. Praveen Bakshi hian February 20 khan Raj Bhavan-ah Larsap Lt.Gen. Nirbhay Sharma a kâwm a, Mizorama venhimna chungchanga thil pawimawhte an sawi dun a ni.

UPC free clinic

UPC (North East India) hnuaia Child Development Center (CDC) chuan Inrinni khan anmahni hmunah a thlawna inentirna an buatsaih a; Dr Zoramthanga leh Dr C Lalfakzuala ten inentirte hriselna din-hmun an enfiah. Mualpuia CDC-ah hian naupang 303 enkawl mek an ni.

PM duhsakna

February 20, Inrinni kha Mizoramin state dinhmun a neih ni, State Day a ni a; Prime minister Narendra Modi chuan Mizoram State Day pual hian Mizo mipuite hnenah duhsakna hlanin, hun lo kal zel turah hmasawnna duhawm tak nei turin duhsakna a hlan a ni.