Poshan Abhiyaan hnuaiah award sem

Women & Child Development department chuan, nimin khan Social Welfare minister Dr K Beichhua pisaah Poshan Abhiyaan hnuaiah award semna inkhawm an buatsaih a, mi eng emaw zat hnenah lawmman an hlân.

Award semnaah hian DPO, CDPO, CO leh award dawngtute koh khawm vek a remchan loh avangin department hotute leh Aizawl Urban leh Tlangnuam ICDS hnuaia lawmman dawngtute an tel a; video conferencing hmangin district danga mite chuan an lo chhim thung.

Inkhawm hi Social Welfare department (SWD) secretary HL Rochungnunga'n a kaihruai a; WCD director Vanlalpianpuii'n award chungchang a sawifiah.

SWM minister Dr K Beichhua chuan, Poshan Abhiyaan hnuaiah India ram pum huapa Mizoramin lawmman a dawng ṭhin chu chhuanawm a tih thu sawiin, "Nau piang 1,000 zela thi (IMR) pawh 5 chauh a ni thei ta leh, India ram puma IMR hniam ber pahnihna kan ni thei ta hi a lawmawm hle," a ti a; department dangte nena an thawhona chu fakawm a tih thu sawiin, an hnathawh leh zel turah taima leh rinawm taka thawk zel turin a fuih.

Dr K Beichhua chuan, Poshan Abhiyaan chu department pakhat hmalakna aṭanga hlawhtling thei a ni lo tih sawiin, "Kan line department hrang hrangte nena kan thawhhonate a ropui hle. Ministry of WCD hian grassroot-a thawkte a ngai pawimawh em em a ni," a ti a; anganwadi worker leh helper, ASHA, health worker leh mi dangte hnathawh chu chhuanawm a tih thu leh award dawngtute a chhuan thu a sawi.

Sorkar laipuia Ministry of Women & Child Development chuan kum 2018-19 chhunga ICDS Project tina anganwadi worker leh helper, accredited social health activist (ASHA), auxiliary nurse midwife (ANM) leh lady supervisor/circle officer-te hnathawh ṭhin hrang hrangte tehfungah hmangin, a huhoa thawk ṭha zualte lawmman pe turin hma a la a ni.

Mizoram Women & Child Development (WCD) pawhin tehfung awm sate hmangin thawk ṭhate hnenah lawmman hlan turin an ruahman a; ICDS Project tina 'Best Team' pakhat zel thlan chhuah niin, team pakhat lawmman atan Rs. 50,000 zel ruahman a ni bawk.

Poshan Abhiyaan (Nutrition Mission) hi March 8, 2018-ah prime minister Narendra Modi-a'n a hawng a, Mizoramah pawh kalpui ve nghal a ni. Mission-in a tum ber chu - naupangte kawng tinrenga tihhmasawn leh tihchak a ni a; naupang kum 6 leh a hnuai lamte bakah, nu nau pâi, nau pawm leh tleirawlte a huam a ni.