Zirtirtu tlem vangin sikul ṭhenkhatah Zirtirtu an indaih lo: H Rohluna

School Education minister H Rohluna chuan, zirtirtu an indaih loh avangin sikul ṭhenkhatah zirtirtu an indaih loh thu a sawi a, "Mamawhna vanga pawhpên leh training lai tih loh chu an awmna hmun tura awm lo zirtirtu an awm kan hre lo," a ti.

Vanglaini palai zawhna chhangin H Rohluna chuan, an awmna hmun tura an tih an duh loh vanga sawn zirtirtu an awm an hriat loh thu a sawi a, "Tunah hian zirtirtu eng emaw zat an training mek bakah, ṭhenkhat chu mamawhna avangin an awmna tur ni loa pawhpênte an ni," a ti a; a theih ang anga zirtirtu indaih lohna chu chinfel zel an tum thu a sawi.

H Rohluna sawi danin, tun hmaa zirtirtu tur lakna recruitment rules (RR)-ah a hranpaa science leh mathematics zirtirtu tur lak an ni ngai lo a; zirtirtu atana lak zinga B.Sc. awmte chu science leh mathematics an lak tir mai
ṭhin. Chutiang a nih avang chuan sikul hrang hrangah mathematics leh science zirtirtu turah harsatna a awm a ni.

School Education department chuan RR thar, mathematics leh science zirtirtu tur lakna tur an siam thar tawh. RR thar hmangin zirtirtu lak tuma ruahmanna kalpui mek a ni a, lak an nih hunah mamawhna zualpuiah chuan mathematics leh science zirtirtu dah an ni ang a, mamawh zawng zawng erawh vawi khatah pek theih an ni dawn lo.

Headmaster-ah harsatna an tawh thu sawiin School Education Minister chuan, "Zirtirtute tam tak chuan headmaster-a awm a, hmun danga insawn an duh loh avangin headmaster tura appointment kan pek tam tak chuan an hnar ṭhin. Hei vang hian headmaster-ah harsatna a awm a, tunah pawh MPSC-in headmaster tur a appoint leh dawn a, mahse tam tak chuan an hnar leh mai thei a ni," a ti.

H Rohluna chuan, headmaster atana appoint pek, an duh lo chung nihtir chu an right palzûtna a ni thei nia sawiin, "A duh lote hrem theihna awm chhun chu kaisanna chance an neih pawhin kum khat chhung offer pek loh a ni," a ti a; kum khat hnuah chuan kaisanna chance an neih hup behsak theih a nih tawh loh thu a sawi.

Khaw ṭhenkhat an ṭhahnemngaihna avanga pawisa thawhkhawma zirtirtu ruai an awm ṭhin chu lawmawm a tih thu sawiin School Education Minister chuan, "Hetianga khawtlangin zirtirtu an ruai hi sorkar tan chuan mualphothlak hle mah se, a loh theih lohna chin a awm ve si a ni," a ti.