Nausen thihna tih-hniam dan tur sawiho

Health department leh MHIP general headquarters ṭangkawp chuan nimin khan Chanmari YMA Hall-ah nausên thihna leh nau chunga nu thihna tihhniam dan tur zirhona neih a ni a; Aizawla MHIP branch hrang hrang aṭangin aiawh ṭhahnem tak an tel.

'Awareness campaign on reduction of Infant Mortality Rate & Maternal Mortality Rate' hi MHIP vice president Dr Lalthanpuii Hnamte-in a kaihruai a; Health Services-a joint director (Planning) Dr F Lianhlira'n nausen thihna leh raicheha thihna chungchanga Mizoram dinhmun a sawifiah.

Khuallian Dr K Ropari, Health principal director chuan, naute hrisel nan nu an pawimawh thu sawiin, nausen thihna tihniam turin mahni veng ṭheuhah nute'n ṭan an lak a pawimawh thu a sawi a; "IMR leh MMR tlahniam tur chuan faina ngaih pawimawh a, a hun taka inentir nacháng hriat leh hri venna lâk ṭhat a pawimawh," a ti.

Inkhawmah hian gynae-cologist Dr Lalremruati Hmar-in nau pai lai
aṭanga inenkawl pawi-mawhzia leh damdawi-ina nau neih pawimawhzia a sawi a; state EPI officer Dr Lalzawmi'n hri venna chungchang a sawi. Aizawl Civil Hospital-a Paediatric HoD Dr Lalmalsawmi Hmar-in naupang enkawl dan leh nau hnute pek dan, School Health state programme officer Dr Lalthlengliani'n ṭhalaite hriselna chungchang leh Dr Chawngthansiami'n iodine pawimawhna an sawi bawk.

Awareness campaign-ah hian Aizawl khawpui chhunga MHIP branch 85 aṭangin mi 300 vel an kal khawm a ni.