Kan sorkar hunah AR kan sawn ang - MNF Senior Vice President

MNF senior vice president Tawnluia chuan, MNF an sorkar leh hunah Aizawl khawpui lailia Assam Rifles-te chu an sawn chhuak dawn niin a sawi.

Nimina Mizo Hnam Rûnah party inkhawmah thu sawiin, Tawnluia chuan, "Kan sorkar leh hunah Aizawl khawpui laili aṭangin AR-te kan sawn chhuak ang. Zokhawsangah AR-te sawn chuah a nih theih nan kum 1987-a Pu Laldenga sorkar khan hna hmasaah neiin, theihtawpin hma a la nghal chat a. Khatih lai khan Revenue Minister ka nih angin ṭum thum Zokhawsang ka tlawh a ni," a ti.

Tawnluia sawi danin, AR-te awmna atan Zokhawsang hmun chu Laldenga hun laiin an tihfel vek hman a, a hnua Congress kum 10 sorkarin a ngawibopui a ni. Zoramthanga kaihhruai MNF in kum 10 chhungin AR-te insawnna tur kawng harsa zawng zawng a su tlang leh hman vek a, Zokhawsanga an inbenbelna tur cheng vbc. 140 chuang an sawi chhuak hman a ni.

Tawnluia chuan, prime minister Narendra Modi-a'n Mizoram State Day lawmpuina a rawn thawn chu lawmawm an tih thu sawiin, "India PM-in a ngaih pawimawh em em Mizoram sorkarin a lawmna hun a siam lo leh holiday atana a puang lo hi a pawi hle a ni," a ti a; Congress sorkar ch MNF sûlhnû chawimawi leh bawhzui duh lo hrim hrimah a puh.

MNF MLA K Sangṭhuama pawhin thu sawiin, "Falkawn Referral Hospital chungchangah MNF hian sawi tur kan nei. Main building leh quarters zawng zawng hi MNF sak vek a ni a, Congress sorkar hian bawngtuthlawh cheh khat pawh a chek ve lo. MNF building sakah medical college din an tum mai a ni zawk," a ti.