Chhiatrupna a thlena inrálrin dan sawihona Delhi-a buatsaihah CM Hawla a tel

Jamia Millia Islamia University-a Centre for North East Studies and Policy Research (CNESPR) conference room, New Delhi-ah khuarel chhiatna chungchang sawihona buatsaih a ni a, chief minister Lal Thanhawla a tel.

Lal Thanhawla chuan, hmar-chhak bial chu khuarel chhiatna tam tak - lirnghing, tuilian, leimin leh thlipui lakah a him lo hle tih a sawi a, "National Institute of Disaster Management-a mithiamte pawhin Himalaya tlang chhuah lamah lirnghing na taka thleng thei reng a ni tih an sawi. Kum 1950-a Assama lirnghing thleng aia hlauhawm zawk a thleng ang tih hi mite hlauh a ni," a ti.

Chief Minister chuan, hma-sawnna avangin chenna in ṭha tak tak a pung zel tih sawiin, "Heng inte hi lirnghing lakah a him lo hle. Chhiatna namên lo hmachhawn thei reng kan nih avangin lirnghing thlen thulhah chhiatna a thlen tlem theih nan mumal taka kalphung duan te, inrálrin dan leh a taka a thlen palha tih tur leh tih loh tur zir lawk a pawimawh hle a ni," a ti a; chhiatrupna thlen thulha inrálrinna atan sorkar, tlawmngai pawl leh mimal thawhho a ṭul thu a sawi.

Khuarel chhiatna laka him a pawimawh avangin inzirtirna uar taka puanzar leh social media-te hman ṭangkai a pawimawh thu sawiin Lal Thanhawla chuan, "Khuarel chhiatna a thlena a nghawng kal zel,ah mihring hrisel-na tichhe thei laka kan him theihna tura damdawi lam mithiamte koh zung zung an nih theina tura hmalak te, a bikin thingtlang lamah a pawimawh hle," a ni.

Conference-ah hian khuarel chhiatna thlen thulha mihring hriselna, rilru hahna leh buaina bakah, in sak dan chungchangte ngaih pawimawh bikah dah a ni a; Nepal leh Manipur-a lirnghingin chhiatna a thlen vanga hmarchhak bial pum leh Himalaya chhehvelte a him lohzia a tihlan avangin mipui vantlang ngaih pawimawhte leh kalphung mumal tak buatsaih dante sawiho a ni.