DM-te'n Cr.PC an hmang dik lo thin

Mizorama dan lam thiamte chuan, district magistrate-te'n Cr.PC Section 143 leh 144-te chu a hman lohna turah an hmang fo niin an sawi a; tun hnaia Serchhip District Magistrate-in Cr.PC 143 hmanga sava veh leh tihhlum khapna thupek a chhuah pawh tih dan tur a nih loh thu an sawi.

Cr.PC Section 143-ah chuan, "Magistrate may prohibit repetition or connuance of public nuisance. A District Magistrate or Sub-Divisional Magistrate, or any other Executive Magistrate empowered by the State Government or the District Magistrate in this behalf, may order any person not to repeat or continue a public nuisance, as defined in the Indian Penal Code (45 of 1860 ), or any special or local law," tih a ni.

Cr.PC 144 chu district magistrate emaw, sub-divisional magistrate emaw, state sorkar-in executive magistrate thuneihna a pekte'n vantlang leh mi dangte tana hnawksak thil an khap theihna chungchang (Power to issue order in urgent cases of nuisance of apprehended danger) a inziak.

Cr.PC 143 leh 144-te hi district magistrate-te'n an hmang sual foa an hriat avangin Mizoram Law Commission pawhin a lo ngaimawh tawh a, district magistrate-te chu thil an lo zawhfiah tawh bakah, a hmanna tur leh hman lohna turte an lo hrilhfiah tawh a ni.

MIzoram Law Commission chairman hlui R Lalrinawma, MLA chuan, "District magistrate-te hian dan awm sa reng Cr.PC hmangin thupek an chhuah hnan ṭhin. Thupek an chhuah chhante kan zawtfiah tawh a, a puan dan turte kan hrilh tawh. Commission lam pawhin district magistrate-te hriat turin hriattirna kan tichhuak tawh a ni," a ti.

Dan lam thiam pakhat chuan, district magistrate-te'n Cr.PC 143 leh 144 chu an hmang uar tih sawiin, "Zu khap burna dan, MLTP Act hman reng lai pawhin district magistrate ṭhenkhat chuan Cr.PC 144 hmangin zu an khap leh chhawng a, MLTP Act hnuaiah khap sa reng a nih avangin Cr.PC hmanga khapna thupek chhuah a ṭul tawh lo," a ti.

Hetih lai hian, Serchhip district magistrate Dr Lalrozama chuan February 17, 2016 khan Cr.PC Section 143 hmangin Serchhip district-ah sava veh leh tihhlum khapna thupek a chhuah. Sorkar thuchhuahah chuan, "...Serchhip district huam chhungah sava tihhlum theihna hmanrua tûr (poison), air gun, sairawkherh, thang, etc. hmanga sava man emaw, thah emaw khapna thupek a chhuah a, thupek zâwm lote chu IPC Section 188 hmanga hrem an ni ang. He thupek hi February 16, 2016 aṭanga chhiar a thla hnih chhung hman tur a ni," tih a ni.

Serchhip District Magistrate-in Cr.PC hmanga sava veh leh tihhlum khapna thupek a chhuah chungchangah hian Vanglaini palai zawhna chhangin, judicial officer senior pakhat chuan, sava veh khap chu district magistrate-te'n Cr.PC hmanga an khap chi a nih loh thu leh, district magistrate-te'n Cr.PC Section 143 leh 144 an hman dan chu a dik tawk loh fo thu a sawi.

Judicial officer dang pakhat chuan, sava veh khap chungchang chu an buaipui tawh thu sawiin, "Sava veh khapna dan Cr.PC-ah chuan kan hmu lo... Cr.PC 143 emaw, 144 emaw ang chuan a hremna chu IPC Section 188 a ni. Mahse, a dan a dik loh avangin Court-ah chuan discharge an ni fo ṭhin. DC-te'n order an chhuah duh pawhin, Wildlife Protection Act hmanga hrem theih a ni tih mipui hriattirna chhuah a tâwk mai," a ti.

Judicial officer sawi danin, sava veh leh tihhlum khapna dan chu Wildlife Protection Act, 1972-ah a awm sa a, Cr.PC hmangin a hranpaa khap a ngai tawh lo. Sava veh leh tihlum hriate tan FIR/complaint thehluh theih a ni a, man an nih chuan Wildlife Protection Act hmanga hrem tur a ni.

Tunlai hian Mizoram hmun hrang hrangah miin sava an veh nasa a, sava pawh an tihlum nasa hlea sawi a ni a; social media lamah pawh sava kah thlâk tawh tam tham tak tak thlalak a darh nasa hle.

Thu dawn danin, police DIG aṭangin sava veha tihlum ṭhinte chungchanga hma la tura hriattirna thawn chhuah a; Mamit district-ah chuan police leh District Forest Officer-te'n
ṭan an la mek a, sava veh ṭhinte thlîthlâi turin 4th. IR police-te ramhnuaiah an vâk kual (patrol) dawn nia thu dawn a ni.