Thla 9 chhungin Kolasib district-ah HIV hrik pai mi 78 hmuh chhuah a ni

Kolasib District AIDS Prevention & Control Committee chu nimin khan DC H Lalengmawia hoin DC conference hall-ah an ṭhukhawm a; April-December, 2015 chhungin Kolasib district-ah HIV hrik pai mi 78 hmuh chhuah a nih thu tarlan a ni.

H Lalengmawia chuan, HIV vei an pung chho chu ngaihtuahawm a tih thu sawiin, "HIV/AIDS dona kawnga beidawng lo a, thâ thlah loa thawh a pawimawh. Sum harsatna chu hmasawnna tiṭhuanawptu leh dâltua ngai loin, hma lama min nawr kaltirtu zawka ngaiin, kan hma zawn ṭheuhah HIV dona kawnga hma kan lak a ngai a ni," a ti.

Meeting-a tarlan dan-in, Kolasib district-ah April-December, 2015 chhungin mi 2,196 thisen endik a ni a, mi 70-in HIV an vei tih hmuh chhuah a ni. Nu nau pai 1,862 thisen an test aṭangin mi pariatah HIV an hmu a, a kai tam ber chu kum 25 leh 34 inkar an ni.

Kum danga damdawia inchiu ṭhinte'n hriau thinghlim lo an hman vanga HIV kaite an tam loh laiin, kum 2015 leh kumin January thlaa HIV hrik pai an hmuh chhuahte zinga 40% vel chu inchiuna thianghlim lo hman vang a ni.