Thingsaiah chaw nghei ṭan

Thingsai NGO Coordination Committee chuan Thingsai High School-a science zirtirtu leh middle school pahniha headmaster dah tura an phûtnain awmzia a la neih loh avangin nimin aṭang khan chaw an nghei ṭan.

Thingsai NGO-te hian Thingsai H/S-a zirtirtu dah leh Thingsai M/S leh Saikuti M/S-a headmaster dah an phût avangin kar hmasa khan Thingsaia sikul zawng zawng an khâr a, pawl 9 leh 11 zirlaite'n promotion exam an neih theih loh phah a ni.

Sikul khârin awmzia a neih loh avangin Thingsai NGO-te chuan nimin aṭang khan YMA office-ah chaw nghei an ṭan a, tunah hian mi 30 chuangin an nghei mek a ni.

Thingsai NGO Coordination Committee chuan, sorkar lak aṭanga thu lawmawm an hmuh hma chuan chaw nghei an tum thu an sawi a, "Chief Minister leh School Education Minister-te'n a rang thei ang bera kan mamawh min tihhlawhtlinsak kan ngen a ni," an ti.