Health department hotute'n Zika chungchang an sawiho

Nimin khan Health department principal director Dr K Ropari pisaah tunlaia khawvela natna lâr Zika virus chungchang sawiho a ni a; Health department-a programme officer-te an tel.

Dr K Ropari chuan, Zika virus natna chu India ramah a la thlen loh avangin Mizoram sorkar tan pawh hma lak ngawt theih a ni lo tih a sawi a, "Sorkar laipui kaihhruai-na angin inpuahchah ngaite lo inpuahchah a, a lo thlen thut pawha lo bei let a, hma lo la turin inrálrin reng a ni," a ti. Mipuite chu Zika virus vangin chî-âi lo tur leh sorkar hmalakna ngaichâng turin a chah a ni.

Sawihonaah hian Integrated Diseases Surveillance Control Programme (IDSP) state nodal officer Dr Pachuau Lalmalsawm-a, epidemiologist-in Zika virus chungchang a sawifiah. A sawi danin, Zika virus chu natna chikhat, Aedes thosi-in a seh aṭanga inkai chhawn a ni.

Dr Pachuau Lalmalsawma chuan, India ramah Zika virus hmuh la ni lo mah se, a lo thlen palha hmalak dan tur inkaihhruaina Ministry of Health and Family Welfare-in a siam tawh a, chu chu state tinah pek a nih tawh thu a sawi.