KHAWTHLIR

Lunglei SP conference hall-ah nimin khan Anti Drug Drive Week for Lunglei District hawn a ni. Week hawngtu SP Stephan Lalrinawma chuan, Week hman a ngaihna chhan sawiin, "Mizoram bikah Champhai, Kolasib leh Mamit district-te chu ruihhlo hluarna angin ngaih a ni a, mahse, kan district pawh hi ruihhlo donna kawngah ṭan kan lâk nasat hle a ngai a ni," a ti.

National Service Scheme (NSS) State Cell chuan nimin khan Civil Hospital, Aizawl Blood Bank-ah thisen pek rûnpui an huaihawt a, NSS volunteer mi 58-in thisen an pe. Thisen petute chu - J Thankima College NSS aṭangin mi 25, Aizawl North College NSS aṭangin mi pakua, MICE NSS aṭangin mi pakua, Helen Lowry HSS aṭangin mi pariat leh Chaltang HSS NSS aṭangin mi pasarih an ni.

Salvation Army enkawl Adult Rehabilitation Centre (ARC), Chhiahtlang chuan nimin khan an kum 10 tlin an lawm a, minister of state Lalruatkima'n hmanpuiin, din champha puala lungphun a hawng. ARC hi Salvation Army chuan ruihhlo chi hrang hrang leh mipat hmeichhiatna lama rahbi tleu tawhte enkawlna hmun atana August 22, 2010-a an buatsaih a ni.

Information & Public Relations (IPR) department leh Mizoram Film Forum-in Short Film Competition and Short Awareness Video Clip Competition an buatsaiha ti ṭhate hnenah nimin khan IPR Auditorium-ah lawmman sem a ni a, IPR director Lallianpuii'n a hmanpui.

State Referral Hospital-ah Covid-19 vei mi 14 enkawl mek an ni a, an zingah kum 60 chung lam mi pali leh kum 14 hnuai lam mi pahnih an tel. SRH-ZMC Bulletin tarlan danin, mi 14 zinga pakhat chu ICU-ah enkawl niin oxygen pek a ni a; mi dang zawng Isolation ward-ah awmin, an zinga pathum chu oxygen pek an ni bawk.