MZP huaihawtin Aizawlah kawngzawh

MLA candidate atana hnam dang pasal nei Mizo hmeichhia dah duh loh lantir nan MZP chuan nimin khan Aizawlah 'Hnam humhim kawngzawh' an huaihawt a, hnam dang pasala nei MLA candidate-te chu vote lo turin mipui an ngen.

Kawngzawh hi Zarkawt kâwnah ṭan a ni a, Vanapa Hall thlengin kawng an zawh. Zarkawt kawnah MZP general secretary Chinkhanmanga Thomte-in thu sawiin, Vanapa Hall kawtah MZP president H Lalthianghlima'n thu a sawi a, resolution an siam bawk. Police-te chuan mi 1,900 tel angin an chhût a ni.

Kawng zawhtute hian MLA candidate atana Mizo hmeichhia, hnam dang pasal nei dah an duh lohna thuziakte an keng a; 'Zoram hi Zo fate tan' tih te, 'Hnam dang pasal nei MLA candidate hi kan duh lo' tih leh, 'Zo fate chîmral pawisalo party an awm hi kan duh lo' titein an au rual.

MZP President chuan, hnam dang pasal nei MLA candidate-te an tlin loh nan hma an la zui zel dawn tih sawiin, "Mizo hnam hi thisenah a nih avangin hnam dangte Mizorama an awm rei tawh avanga Mizoa pawm chi an ni lo," a ti.

KAWNGZAWH RESOLUTION
■ Mizoram rorêlna sang ber, Assembly House-a ṭhu turin hnam dang pasal nei kan duh lo.
■ Hnam dang pasal nei MLA candidate-te hi hnâwl a, vote lo turin mipui kan ngen.
■ Mizoram leh hnam humhim a nih zel theih nan a tàwp thlengin ke kan pên zel ang.