Thuthlung hi party-te'n an pawm vek a ni - MPF: Thuthlung bawhchhiat, mipui zah lohnaa an ngai

Mizoram People Forum (MPF) hruaitute chuan, MPF leh political party-te Thawhhona Thuthlung chu MPF siam bik a ni lo a, political party tin aiawhte nen an sawiho hnua an pawm tlân, party president ṭheuhin hming an ziah hnan a nih avangin, Thuthlung bawhchhiat chu mipui zah lohnaa an ngaih thu an sawi.

MPF Gen.Hqrs hruaitute leh thuthar thehdarhtute nimin khan Aizawl Press Club-ah an inkâwm a; MPF general secretary Rev. Lalramliana Pachuau chuan, "Thawhhona Thuthlung hi political party hrang hrang aiawhte nen ṭum eng emaw zat sawiho hnuah siam a ni a, party president ṭheuhte'n an hming an ziah hnan a ni bawk. Heti chunga zah lo taka bawhchhiate chu mipui zah lohnaah kan ngai," a ti.

Rev. Lalramliana Pachuau chuan, Thawhhona Thuthlung 3(3)-ah, inthlan puan hnuah chuan political party-te'n kawngzawh an huaihawt phal a ni lo tih sawiin, "Tun hnaiah Mizoram hmun ṭhen­khatah Thuthlung bawhchhiaa kawngzawh thâwm hriat tur a awm nual a, a pawi kan ti hle," a ti. Political party-te chu an pawm thlap tawh Thuthlung zah a, kawngzawh huaihawt tawh loh turin an chah.

Tun hnaia Rahul Gandhi hoa Aizawla kawngzawh chungchang zawhna chhángin MPF GS chuan, kawng an zawh dawn tih an hriatin an bia a, kawng zawh lo turin Congress party chu an insawi tih a sawi.

Inkawmhona kaihruaitu MPF vice president Nghaklianmawia chuan, Thawhhona Thuthlung chu MPF bik siam a ni lo a, political party-te'n an pawm thlap vek a nih thu sawiin, "Thuthlung a hlawhtlin theih nan party-te nen theihtawpa ṭan tlan kan mamawh tak zet a, party-te pawh kan ngen a ni," a ti.

MPF adviser Vanlalrema Valtawl chuan, "Thuthlung hi MPF-in party-te a nawr luih leh a barh luih a ni lo. Kan sawiho hnua kan pawm tlân a ni a, thawhhona a nih avangin a tihhlawhtlin kawngah party-te hian mawh an nei a ni," a ti bawk.

MPF hruaitute chuan, in tina luta campaign (house to house) chu political party-te duh dan zawk a nih thu an sawi a, "Thuthlung 2(2), house to house campaign phal loh chungchang hi inthlan puan ní, October 9, 2023 aṭanga hman ṭan a ni. District forum, constituency forum leh local forum-te chu an chhungah ṭhahnemngai taka hma la turin kan ngen. Party-te pawhin house to house campaign kalpui tawh loh tur a ni," an ti.

MPF hmalaknain awmzia a neih leh neih loh zawhna chhangin Rev. Lalramliana chuan, "Kan inthlanna felfai ta viau leh state dangte'n model ang hiala min sawite hi MPF hlawhtlinna a ni kan ti," a ti a; MPF awm ta lo se, Mizoram inthlan awm zel dan tur chu mahnia ngaihtuah zui mai chi a nih thu a sawi.

MPF GS hlui Upa Lalramthanga chuan, "MPF dinna leh din lohna a inthlau. MPF din lohna bialah chuan pawisa chauh ni loin, an thil sem a hraw thei viau, fridge leh bike-te pawh a tel an ti a, kuminah pawh an sem hraw viau niin an sawi," a ti a; chief minister hlui Lal Thanhawla pawhin MPF din lohnaah chuan sum sèn a tam bik thu a sawi tawh tih a sawi a ni.

Zawhna chhangin MPF hruaitute chuan, inthlan apiangin Thawhhona Thuthlung bawh­chhiatna a awm ziah thu an sawi a, "Action va la vak vak thei kan ni lo. Dan leh hrai hmanga va ti chiam turah kan inngai lo. Ti tawh lo tura kan ngen hnua ti lui zel an awm chuan vantlang hriata puanzar leh thuneitute hnenah thlente hi kan tih theih a ni," an ti.

MPF HRUAITUTE TARLAN DANGTE

* Thawhhona Thuthlung 2(3)-in a tarlan angin, candidate-te hnena mimal leh pawl hminga thil dil hi tih loh tur a ni a, khawtlang huapa candidate-te intiamna neihtir pawh tih loh tur a ni.

* Thuthlung 3(2) angin, veng/khaw tinah candidate/party-te iptepui bànna aṭangte hian mipui náwlpui bakah, zirlaite leh damlote tana harsatna thlen thei thâwm bengchheng leh ninawm siam loh tur a ni.

* Thuthlung 2(3) leh Model Code of Conduct-in a phal loh angin, mipui hnenah thil chi hrang hrang sem loh tur a ni a, t-shirt sem pawh ti tawh lo turin candidate-te kan ngen.

* Social media-ah inthlan chungchanga thu belhchian dâwl lo thehdarh leh mimal inbeihna uchuak lutuk ti lo turin mipui kan ngen. Hetiang a awm a nih chuan thuneitute hnenah hma la tura thlen a ni ang. [Thuthlung 3(4)]

* Party tinte'n manifesto leh candidate-te chanchin an sem duh a nih chuan local forum hriatpuinaa sem tur a ni.

* Thuthlung 2(6) angin, khua/veng tinah party flag leh banner târ theih zat bituk a ni a, tun hnaiah flag târ kan uar thar leh niin a lang a, tàr theih zat bituk aia tam tár lo turin kan inngen a ni.

* Thuthlung bawhchhiatna a awm nia hriat a nih chuan tute pawh MPF-ah report thehlut turin kan inngen.