Bial 25 chung lam kan la ang - Zoramthanga
MNF president Zoramthanga chuan, November 7, 2023-a Mizoram Assembly inthlanpui awm turah MNF party-in seat 25 chung lam an lâk tur thu a sawi.
Zoramthanga hian nimin khan nomination a thehlut a; thuthar thehdarhtute zawhna chhángin, "Kan term chhungin Mizoramin harsatna hrang hrang kan tâwk a, heti chunga kan hmalakna hi mipuiin ṭha an tiin ka hria. Keini pawhin harsatna hrang hrang kara hetianga hna kan thawk thei hi mak kan ti zawk," a ti.
MNF President chuan, sorkarna an chan leh ngei tur thu sawiin, "Ka bialah chuan inthlan hmasa aiin ka chakna a tam zawk ang. Mizoram pumah pawh chakna kan chang ngei dawn a, seat 25 chung lam kan la ang," a ti a; ZPM party chu Congress party aia an khingpui lian zawk tur an nih thu a sawi.
Rahul Gandhi-a'n Mizorama BJP leh RSS luhna kawngká anga MNF a puh chungchangah Zoramthanga chuan, "MNF leh RSS hian inzawmna pakhat mah kan nei lo. Central-ah Congress lama kan tel duh loh avangin NDA-ah kan tel. BJP leh MNF political ideology a hrang daih a ni a, tu thuhnuaiah mah kan awm lo," a ti.