NIT, Mizorama non-teaching staff-te'n lungawi loh lantir nan badge dum an bel

National Institute of Technology (NIT), Mizorama thawk, non teaching staff-te chuan lungawi lohna lantirin nimin khan hnathawhna hmunah badge dum an bel a, October 23, Thawhṭanniah pawh lungawi lohna lantir leh an tum.

Thu dawn danin, NIT, Mizorama non-teaching staff-te chuan kum thum vel kal ta aṭangin hotute hnenah an thlen ṭhin a, tihhlawhtlin hun tura thuneitute'n an tiam chu an sawhsawn zel a, chuvang chuan October 18, 2023 khan lungawi lohna an lantir a ni.

Lungawi lohna lantira pisa an kai loh chu thuneitute'n leave without pay (hlawh lak ṭhensak)-a kaltir an tum a, chu chu duh loin, sût turin thuneitute an ngen a, sût a nih loh chuan hmalak chhunzawm zel an tum a ni.

Lungawi lohna hrang hrangte

◆ Non-teaching staff promotion thei tawhte chu kum tam tak promotion ngaihsak an ni lo.

◆ NIT, Mizoram Director leh a duhsak zual mi tlemtête'n Ministry of Education aṭanga NIT, Mizoramin sum a dawn ṭhinte an ngaimawh zawng chauhah an hmang ṭhin a, zirlaite tana bus hman man, security rawihna, hostel tana tui leina leh sanitation staff rawihna man pe thei loin an awm.

◆ Registrar nghet lakna tur advertisement 19.04.2023-ah chhuah a ni tawh, tunah Director-in a duhsak bik professor pakhatin charge a la mek. Registrar post advertise rualin technician (EEE) post khat leh office attendant post pakhat advertise a ni a, advertisement hi bawhzui lohin a awm reng.

◆ Advertisement chhuah loin JE (casual) pahnih leh temporary faculty pahnih tun hnaiah lak a ni.

◆ NIT Statute-in thuneihna a pek piah lamah NIT, Mizorama dean-te'n thuneihna an chelek mek.