HBC-ah Media Literacy Campaign buatsaih

Hrangbana College-a Depart-ment of Political Science chuan nimin khan an college-ah political science zirlai vote nei tharte tan kumina MLA inthlanpui lo awm tur pualin 'Media Literacy Campaign' an buatsaih a, Mizoram University Department of Mass Communications-a Prof. V Ratnamala-i'n a hmanpui.

Campaign hi HBC assistant professor R Lalrinkima'n a kaihruai a; Prof. V Ratnamala chuan, vote nei tharte'n media an hman uluk a ṭul thu sawiin, "Tunlaiah chuan social media kan hmang nasa a, hei vang hian kan thil chhiar leh hmuhteah dik lo leh fel lo a awm thei a, inthlan dawn hnaiah phei chuan phuahchawp deuha thil kalpui a awm thei a, print media leh visual media emaw, internet site rintlakah en zel a ṭha," a ti.

HBC zirlai, vote nei tharte hi social media kaihhnawiha information dik lo laka anmahni bakah an chhehvela mite kaihhruai dan tur te, thlalak leh thuziakte a dik leh dik loh finfiah dan tur leh thil pawimawh hrang hrang zirpui an ni.