MZU Alumni Grand Annual Meet hmang

Governor Dr Hari Babu Kambhampati, Mizoram University chief rector ni bawk chuan nimin khan MZU Auditorium-ah MZU Alumni Grand Annual Meet a hmanpui a, "University ṭha tehfung atana thil pawimawh tak pakhat chu, university aṭanga zir chhuakte hlawhtlinna, an hnathawh leh an thil tihte a ni," a ti.

Governor chuan, MZU aṭanga zir chhuak tawh intél khawmte'n MZU hmasawn zelna atan theihtawp an chhuah chu lawmawm a tih thu sawiin, "University ṭha tehfung atana thil pawimawh tak chu, zir chhuakte hlawhtlinna, an hnathawh leh an thil tihte a ni. MZU hian tun hnaiah hmuh theihin hma a sawn nasa a, kum záwnin NIRF ranking-a India ram university ṭha zual 100 zingah a ṭha mai ni loin, hma a sawn zel a ni," a ti a; MZU Alumni chu tuna zirlaite tan kawng sialsaktu leh kawhhmuhtu an nih thu a sawi.

Sorkar laipuia social security scheme leh hamṭhatna tam tak mipuiin an hmelhriat loh vanga hamṭhatna dawng lo an tam thu sawiin Larsap chuan, "Hamṭhatna dawng theite hriatthiam turin scheme hrang hrangte hi zirtir a pawimawh a, vawiina lo kal khawmte hi mi tin hriatthiam tura zirtirna petu ni turin ka sawm che u a ni," a ti.

Meet hi MZU Alumni president Emanuel Lalhriatzuala Ralte-in a kaihruai a, khualzahawm Prof. Laltluangliana Khiangte, MZU acting vice chancellor pawhin thu a sawi. MZU-a gold medalist-te leh MZU aṭanga zir chhuak Mizoram sorkar leh sorkar laipui hnuaia officer-te, vice chancellor, registrar leh professor chàwl tawhte hnenah chawimawina hlan a ni.