PUC-ah Young Voters' Education buatsaih

Pachhunga University College-a post graduate zirlai pawl Students Council leh Directorate of Election chuan nimin khan PUC Seminar Hall-ah Young Voters' Education leh Political Talk an buatsaih.

Chawhmaah Young Voters' Education hun hman a ni a, Election aṭangin assistant commissioner Lalchhanhimi'n EVM, VVPAT leh Model Code of Conduct chungchang a sawifiah a, Tlangnuam BDO Jennifer Vanlalhruaii'n SVEEP leh IT application chungchang a sawi thung.

Zirhona inkhawm hi PUC Mizo department assistant professor Dr H Laldinmawia'n a kaihruai a; PUC principal Prof. H Lalthanzara'n thu sawiin, "Ram leh hnam siamṭha tak tak turin ram hruaitu ṭha thlan a pawimawh," a ti a, inthlanah vote thlâk vek turin zirlaite a sáwm.

Chawhnuah Political Talk buatsaih a ni a, Congress party aiawhin president Lalsawta, MNF aiawhin adviser Lalruat-kima leh ZPM aiawhin Dr Lalmal-sawmzauva ten thu an sawi a ni.