KHAWTHLIR

Postal ballot phal

Election Commission of India chuan essential service duty turte chu kumin MLA inthlanpui vote thlak ní, November 7, 2023-ah postal ballot hmanga vote thlak a phalsak. Vote thlak phalsakte chu - Airport Authority of India, Food Corporation of India, Press Information Bureau, Doordarshan, All India Radio, PE department, Health department, Transport department, FCSCA department, BSNL, ECI-in vote thlak ni a phalna a pek media mite, Fire & Emergency Service leh Lengpui Airport security duty-te an ni.

CCTV dah turin ti

Aizawl district bawrhsap Nazuk Kumar chuan thupek chhuahin, Aizawl district-a Scheduled H, H1 & X damdawi zawrh phalna nei damdawi dawrte chu closed-circuit television (CCTV) dah vek turin a hriattir. Thupek bawhchhiate chu dan anga hrem theih an nih tur thu a tarlang.

Inthlan tur sawiho

Saitual district-a general observer Giriwar Dayal Singh, police observer Naveen Saini, bawrhsap Dr Lalsanglura Tlau bakah, Ṭawi leh Chalfilh constituency-a returning officer-te chu nimin khan Saitual DC pisaah an ṭhukhawm a, inthlan kaihhnawiha Saitual district inpuahchah dante an sawiho. Saitual district-a MLA bial pathum - Ṭawi, Chalfilh leh Lengtengah voter 55,674 an awm a ni.

Ngaihven theih

Aizawl DC Nazuk Kumar chuan, inthlan nía essential service duty tur, postal ballot hmanga vote thlak turte chu Aizawl DC Office Facilitation Centre (Nazarat Branch)-ah postal ballot dilna ngaihven tur leh October 25, 2023 ral hmaa dilna thehlut turin a hriattir. Dilnaah voter identity card photo copy, hming leh phone number chiang taka ziah tur a ni a, duty detailment order thil tel tur a ni.

Voters Festival

Serchhip College SU-in ni thum awh Young Voters Festival an buatsaih chu nimin khan an college hall-ah khâr a ni a, festival puala intihsiaknaa ti ṭhate hnenah lawmman hlan a ni. Festival-in a tum chu, democracy rama inthlan pawimawhzia tarlan leh vote thlak tura ṭhalaite tihphûr a ni.