CEO hoin inthlan inbuatsaih dan thlirho

Chief electoral officer (CEO) Madhup Vyas hoin nimin khan a pisaah MLA inthlana sorkar inbuatsaih dante thlirho a ni a; Aizawl, Kolasib, Champhai, Mamit, Khawzawl, Saitual leh Hnahthial district-ahte polling station tinah electricity, inthiarna, tui in tur, wheelchair ramp leh furniture-te ruahman fel tawh a nih thu tarlan a ni.

Madhup Vyas chuan, inthlanna langtlang, felfai leh hlawhtling buatsaih a nih theih nan thawhhona ṭha a pawimawh thu a sawi a, "Hmalaknate inhriatpawh tawn zel a ṭul a, inthlan hi thil dang zawng aia ngaih pawimawh hmasak tur a ni. Inpuahchahna tiṭhuanawp thei thilte awm lo tura ṭan lak tlan a ngai," a ti a, theihtawp chhuah turin a fuih.

Ṭhutkhawmah hian kumin inthlanpui awm tura sorkar department hrang hrangte inbuatsaihna leh hmalakna hrang hrangte thlirho a ni a; hmabak la awmte hun bituk chhung ngeia zawh hman a nih theih nan ṭan lak ni se, an ti.

Mizorama assembly consti-tuency 40-ah polling station 1,276 a awm thu tarlan a ni a; mamawh leh awm ngei ngei tura tih assured minimum facilities (AMF) - electricity, inthiarna, tui in tur, wheelchair lawn theihna (ramp) leh furniture-te October 17, 2023 thlengin Aizawl, Kolasib, Champhai, Mamit, Khawzawl, Saitual leh Hnahthial district-ahte ruahman fel tawh a ni a; district danga hmalak ngai la awmte chak zawka bawhzui a ṭul thu an sawi.

Rualbanlo voter 3,300 awm zingah benchmark disability certificate pek mi 691 an awm tawh thu te, central armed police force (CAPF) company 20-in Mizoram an thlen tawh thute sawi lan a ni bawk.