DEO-te'n an hmalak dan an sawifiah

Mizoram Legislative Assembly inthlan inpuahchahna kal mekah nimin khan Champhai, Kolasib, Saitual, Khawzawl leh Hnahthial district-a district election officer (DEO)-te'n an district chhunga thuthar thehdarhtute an kâwm a, inthlan kaihhnawih thil pawimawhte an sawipui.

Champhai DEO James Lalrinchhana chuan, Champhai district-a MLA bial pathumah chuh tuma hming pe lut mi 10 an awm thu leh vawiinah enfiah a nih dawn thu a sawi. Champhai district-ah hian voter mi 57,180 an awm a, polling station 84 a awm.

Kolasib DEO John LT Sanga chuan, thu lai la tak leh mipui tana pai nuam taka thu thehdarh ṭhin tur leh a ṭha zawnga mipui zirtirna a tam thei ang ber thai lang ṭhin turin thuthar thehdarhtute a ngen. A sawi danin, election duty turte aṭangin postal ballot-a vote thlak dilna 800 a lut tawh. In lama vote thlak dilna 105 (senior citizen 83 leh PwD 22) a lut tawh bawk.

Saitual DEO Dr Lalngura Tlau chuan thuthar thehdarhtute chu inthlanna felfai leh ralmuang tak neih an tum thu leh chumi atan chuan theihtawp an chhuah thu a hrilh.

Khawzawl DEO K Lalrohlua chuan, an district-a bial awm chhun Tuichang constituency-ah nomination thehlut mi pali an awm thu a sawi a, "Kum upa leh PwD-te tan in lama vote thlak theih a ni a, mi 142-in in lama vote thlak dilna an rawn thehluh chu pawm vek a ni," a ti.