Kristian kan danglam ngam a ngai - Lalsawta

Mizoram Pradesh Cong­ress Committee (MPCC) president Lalsawta chuan, Hindu, Muslim leh sakhaw hrang hrang kal duh dan ngaihtuahin, Kristian an danglam ngam a ngaih tawh thu leh Kristian anga ṭan rual a ṭul thu a sawi.

Lalsawta hian nimin khan Congress Bhavan-a political session-ah thu sawiin, "Tuna kan boruak anga duhthlanna hman thiam a ṭul hun hi a awm loin ka hria. Hindu, Muslim leh sakhaw hrang hrang kal duh dan han ngaihtuah hian, Kristian chu kan danglam ngam a ngai ta a ni. MLA General Election 2023-ah pawh duhthlanna dik hmanga ram siam hi mipui hian kan thei a ni tih hriain Congress party thláwp turin ka sáwm a ni," a ti.

Mizorama BJP-te chu anmahnia ding chhuaka sorkarna siam turin Mizo mipuiin an ring lo tih sawiin Lalsawta chuan, "Anni hi kan beih ber pawh an ni lo. BJP leh RSS-in Mizoram luhkaa hman a tum hi chu regional party-te an ni," a ti a; BJP-in MNF an thawhpui mek a, ZPM pawh BJP-in thawhpui tumin thiam takin hma an la mek niin a sawi.