ZPM MLA-te'n special session neih an duh Party worker-te contract pek zel pawi an ti
ZPM Legislature Party (ZLP) chuan nimin khan Governor PS Sreedharan Pillai chu Raj Bhavan-ah an kâwm a; Covid-19 vanga sum leh paia harsatna thleng mek avangin Assembly special session ko turin an ngen. ZLP hi nimin vek khan an ṭhukhawm a, sum harsat laia party worker-te contract pek zel a ni chu pawi an tih thu an tarlang.
ZLP hruaitute chuan, Assembly special session-ah hian Covid-19 vanga sorkar sum hmanna tur nasa taka a danglam tak avangin, kum tàwpa Supplementary Demand for Grants tam tak put luh leh a nih tawh loh nan Budget Re-Appropriation Bill put luh a, a tlachawpa sum hman tur dap chawp loin, sorkarin sum a hmanna leh hmuhna tur hi chiang lehzualin buatsaih an duh a ni.
MLA-te chu mipuite hma hruaitu tur an nih thu tarlangin ZLP chuan, "Inrenchemna kenkawhna atan MLA-te hlawh tihpunna dan kha tihbo ni se la. Kan sum dinhmunin a zir loh avangin MLA-te hlawh hlui zawk anga kan lâk leh theih nan Finance Minister hian special session-ah bill rawn pu lut rawh se," an ti.
Vanglaini palai zawhna chhangin ZLP leader Lalduhoma chuan, special session koh chuan awmze thui tak a neih theih thu a sawi a, "Kan budget kha hripuiin min nuai dawn tih kan hriat hmaa pass a ni. Chuvangin, kan priority-te pawh tihdanglam a ngai," a ti a; session ko si loa sorkarin state sum hman dan a duh duha a tihdanglam ngawt chu thil dik lo a nih thu a sawi.
Lalduhoma chuan, session koh chuan awmzia a neih theih thu sawiin, "Kan Finance Minister-in kan sum dinhmun dik tak a chhawp chhuak ang a, chuta ṭang chuan kan sawiho dawn a ni. Chumi aṭanga kan sum hmuh tur kan hmu phak dawn lo a, heti zawng hian her rem a ngai, hei hi chu ti zawnga kan hman a ngai, heta kan ruahman hi heti hian ti zawk mai ang, tiin kan sawiho thei dawn a ni," a ti.
ZLP chuan, Mizoram sum dinhmun a chhiat viau lai leh sorkar hnathawk hlawh pawh pek kim a remchan tawh loh laiin ruling party worker ho inhlawhna turin contract an inpe zel tih tarlangin, "Hei hi pawi kan ti," an ti a; mipui an harsat laia induhsak bikna kalpui chu an remtih loh thu an sawi.
Sorkar chu inrenchemna a kengkawh duh a, a hnathawkte leh mipui sum a mamawh a nih chuan, sum a hmanna tur leh a hman dan tur chiang taka tarlang turin an phût tih sawiin ZLP chuan, "Sorkarin inrenchemna (austerity measure) a kalpui dan hi kan la duh tâwk lo. Hei aia nasa leh awmze nei zawk hian kalpui rawh se," an ti.