Mizoram MLA inthlan chuh turin mi 170 chuangin hming an pe lut

Mizoram Legislative Assembly general election 2023 chuh tura hming pek luh hun chu nimin tlai khan a tàwp a; hriat theih chinah mi 174-in inthlan chuh turin returning officer-te hnenah nomination an thehlut.

Kumin inthlan turah hian Indian National Congress (INC), MNF leh ZPM party-te'n bial tinah candidate an nei a; BJP-in bial 23-ah candidate an nei a, Aam Aadmi Party (AAP)-in bial pali an chuh dawn bawk.

Hming pe lutte zingah hian hmeichhia 17 an awma hriat a ni a; BJP aṭangin pathum, INC, MNF leh ZPM aṭangin pahnih ṭheuh, Lalpa Chhiahhlawh Intelkhawm (independent) aṭangin paruk leh independent candidate dang pahnih an ni.

Aizawl district tana returning officer Nazuk Kumar, bawrhsap tarlan danin, Aizawl district-ah inthlan chuh tuma hming pe mi 55 an awm. Tuivawl, Aizawl North-I, North-II, East-I, West-II, South-II leh South-III bialahte mi pali ṭheuhin hming an pe a, Aizawl East-II, West-I leh West-III bialahte mi panga ṭheuhin hming pein, North-III leh South-I bialahte mi paruk ve vein hming an pe a ni.

Lunglei district-a bial parukah hming pe lut mi 27 an awm a, Lunglei West bialah mi paruk, Lunglei South bialah mi panga leh, Lunglei North, Lunglei East, Thorang leh West Tuipui bialahte mi pali ṭheuhin hming an pe lut a ni. Siaha district-a bial pahnihah mi pakuain nomination an thehlut a, Saiha bialah mi panga leh Palak bialah mi pali an ni.

Champhai district-ah mi 10-in nomination an thehlut a, Champhai North bialah mi pali leh, Champhai South leh East Tuipui bialah mi pathum ve vein an pe lut.

Kolasib district-ah mi 13-in hming an pe lut a, chungte chu Serlui bialah mi panga leh Tuirial leh Kolasib bialah mi pali ve ve an ni.

Serchhip district-a bial pathumah mi 15-in hming an pe a, Serchhip bialah mi paruk, Tuikum bialah mi pali leh Hrangturzo bialah mi pangain hming an pe lut.

Lawngtlai district-a constituency pathumah mi 13-in hming an pe a, chu'ngte chu Lawngtlai West bialah mi panga leh, Tuichawng bial leh Lawngtlai East bialah mi pali ve ve an ni. Mamit district-a bial pathumah nomination thehlut mi 14 an awm a, Hachhekah mi pali leh Dampa leh Mamitah mi panga ve ve an ni.

Saitual district-a bial pathumah mi 11, Khawzawl district-a bial awmchhun Tuichang atan mi pali leh Hnahthial district-a bial awm chhun South Tuipui atan mi pathumin hming an pe lut bawk.

Nomination paper-te chu vawiin hian endik a ni dawn a, inhnukdawk duhte tan October 23, Thawhṭanni thleng hun hawn a ni ang.

Candidate tam berna bialte chu Aizawl North-III, Aizawl South-I, Serchhip leh Lunglei West niin, mi paruk ṭheuhin nomination an thehlut a; hming pe mi pathum chauh awmna bial Ṭawi, Champhai South, East Tuipui leh South Tuipui bialte a awm bawk.