Mi 174-te nomination pawm vek a ni: Inhnuhdawh hun vawiinah a tàwp dawn

November 7, 2023-a Mizoram Legislative Assembly inthlanpui awm tura candidate nih tum hming pe lut mi 174-te nomination thehluh chu October 21, Inrinni khan endik a ni a; Inrinni khan nomination 173 pawm a ni a, nimin khan pakhat dang pawm leh niin, nomination lut zawng zawng pawm vek a ni.

Inthlan chuh tura hming pek luhte leh lehkha pawimawhte chu Election Commission of India (ECI)-in hun a ruat lâwk angin October 21 khan endik a ni a, mi 173-te nomination chu Inrinni khan pawm a ni. Lawngtlai East biala ZPM candidate ni tura nomination thehluttu Dr Lorrain Lalpekliana Chinzah nomination paper-ah thil fel tâwk lo a awm avangin pawm a ni lo thung.

Dr Lorrain Lalpekliana Chinzah nimonation pawm nghal a nih loh chhan chu, a awmna ZPM party chu ECI-ah recognised party a la nih loh avangin propose-tu mi 10 tal neih a ngai a, Dr Lorrain hian propose-tu mi 10 nei mah se, mi pakhatin a hming a sign loh avangin a nomination chu pawm a ni lo.

Nimin chawhma dar 10 khan Dr Lorrain Lalpekliana Chinzah nomination paper chu endik nawn leh niin, pawm a ni a; heti hian mi 174-te nomination thehluh chu pawm vek a ni ta a ni.

MLA inthlan chuh tumte tan hian vawiin chawhnu dar 3 thleng inhnuhdawh theih hun hawn a ni a; inhnukdâwk lote chu MLA candidate tura tihfel an ni ang.

Mizorama Assembly bial 40 awm zingah hming pe lut tamna ber bialah mi parukin hming an pe lut a, mi parukin hming an pek luhna bial pali awmin, chungte chu - Aizawl North-III, Aizawl South-I, Serchhip leh Lunglei West-te a ni.

Kumin inthlan turah hian Indian National Congress (INC), MNF leh ZPM party-te'n bial tinah candidate an nei a; BJP-in bial 23-ah candidate an nei a, Aam Aadmi Party (AAP)-in bial pali an chuh dawn. Hming pe lutte zingah hmeichhia 17 an awm a; BJP aṭangin pathum, INC, MNF leh ZPM aṭangin pahnih ṭheuh, Lalpa Chhiahhlawh Intelkhawm (independent) aṭangin paruk leh independent candidate dang pahnih an ni.

BIAL TINA CANDIDATE ZAT

6: Aizawl North-III, Aizawl South-I, Serchhip, Lunglei West.

5: Dampa, Mamit, Serlui, Aizawl East-II, Aizawl West-I, Aizawl West-III, Hrangturzo, Lunglei South, Lawngtlai West, Siaha.

4: Hachhek, Tuirial, Kolasib, Tuivawl, Aizawl North-I, Aizawl North-II, Aizawl East-I, Aizawl West-II, Aizawl South-II, Aizawl South-III, Chalfilh, Lengteng, Tuichawng, Champhai North, Tuikum, Lunglei North, Lunglei East, Thorang, West Tuipui, Tuichawng, Lawngtlai East, Palak.

3: Ṭawi, Champhai South, East Tuipui, South Tuipui.