RUSA assistant professor-te'n Mizoram sorkar khin an tum
an tum.
Assistant professor-te hi a hmain high court-ah an kal tawh a; court-a an kal chhan ber chu Mizoram sorkara luh an tum ngawr ngawr vang ni loin, a tir aṭanga dik lo taka appointment pek an nihin nghawng ṭha lo a nei zel dawna an hriat vang a nih thu an sawi a, "Mizoram leh central sorkar chu court kaltlangin kan khing ta a ni," an ti. Sorkar hmalak zui zel danah an lungawi loh avangin high court-ah kal nawn leh an tum a ni.
RUSA assistant professor-te aṭanga thu dawn danin, RUSA 2.0 scheme hnuaiah component 12 chu faculty recruitment lam hawi a ni. Component-in a tarlan dan chuan, state sorkar hnuaia assistant professor post awm sa tihbelh nan post thar, regular permanent post 72 siam turin a ti a, Mizoram sorkar pawhin post thar a siam belh.
RUSA assistant professor-te hnen aṭanga Vanglaini thu dawn danin, kum hnih chhung an hlawh tur sorkar laipuiin a tumpui (90%) ang a, a scheme tawp hunah state sorkarin mawhphurhna zawng zawng a la vek tur a ni tih a ni. Hemi chungchang hi Mizoram sorkarin a ngaihtuah a, DPAR, Finance leh HTE department a kaltlang hnuah Cabinet pawhin RUSA-in a phût anga lak turin thutlukna a siam a ni.
Kum 2019 khan RUSA assistant professor-te chu MPSC kaltlangin UGC Regulations 2018 anga lak an ni a; regular permanent post a nih avangin MPSC kaltlangin open advertisement-a lak niin, kum hnih hnuah emaw, scheme tawp hnuah emaw state sorkarin mawhphurhna zawng zawng a la vek tur a ni.
Mizoram sorkar chuan MPSC-in dan anga a lak tawhna chu ṭhiat lehin, central aṭanga sum hmuhin a daih lo tih chhuanlamin Rs 70,000 (fixed) hlawh turin a ti a; kum hnih hnuah an service tawhte chu regular anga chhiarsak tura an insawi avangin agreement deed a ruahman a, deed-ah chuan regular tih a inziak tel.
Regular chungchang chu December 4, 2019-a induction programme-ah HTE minister Dr R Lalthangliana'n a sawi lang a; RUSA assistant professor-te chu kum hnih hnuah (scheme tawp hnu) tun aia an hlim zawk tur thu a sawi tel a ni.
India ramah Mizoram leh Arunachal Pradesh chiah RUSA hnuaia faculty recruitment support hmang an ni a, Arunachal Pradesh chuan dan ang takin a tìr aṭangin regular vekin a kalpui niin an sawi.
RUSA assistant professor-te chuan, hna an zawm aṭangin hlawh an la mumal lo nghal tih sawiin, "Thla ruk lak loh te, thla sawm lak lohte pawh kan nei ṭhin. Sorkarin a lo tiam tawh zawng zawng hre rengin sorkar laka vuina leh sorkar timualpho zawnga thuchhuah leh nawrh kan nei ngai lo," an ti.
Kum hnih a ral dawn hnaihah sorkarin an ngaihṭhatna tur khawpa hmalakna mumal a neih loh avang leh, sorkar official thenkhatte phei chuan bàn theih an nih thute an lo hrilh ṭhin avangin, an hun tàwp hma kar khat a la awmin an service humhim nan court-ah an lut ta tih an sawi.
Court case kal zela central sorkarin lehkha court-a a thehluh zingah - state sorkar intiamna, central aṭanga sum lo kal baka sum sen belh ngai tur zawng zawng state sorkarin a tum ve theih tur thu intiamna lehkha a tel thu an sawi bawk.
RUSA ASSISTANT PROFESSOR-TE SAWI DANGTE
* High court-a an kal tawhnaa Mizoram sorkar ukilin a chhannaah, RUSA assistant professor-te chungchangah Mizoram sorkarin Cabinet memorandum anga hma a lak mek thu leh file an kaltir mek thu a tarlang. Court-in merit of the case anga kalpui loin, RUSA assistant professor-te representation leh writ petition en chungin state sorkarin thutlukna siam turin a ti.
* Mizoram sorkarin August 25, 2023-ah speaking order a tichhuak a, state sorkarin intiamkamna a siam neih kalha tih a ni.
* Speaking order-ah an lungawi loh avangin sorkar hotute an hmu kual. HTE Minister vawi eng emaw zat an hmu a, Chief Minister an hmu bawk.
* CM-in HTE department chu ni 10 chhunga ngaihtuah ṭha leh turin a ti a, HTE-in an ngaihtuah ṭhat hnuah thil thar tihdanglam a awm ta chuang lo.
* Sorkar hmalaknaah an lungawi thei lo a, an chanvo dik tak an chan theih nan high court-a kal luh nawn leh an tum.