Manifesto 80% vel tihlawhtlingah inngai: 'AR sawn chhuak turin hma kan la zel' dawn' - Lalruatkima

MNF adviser leh minister Lalruatkima chuan, MNF sorkarin kum 2018 inthlan dawna an manifesto zinga 80% vel an tihlawhtlinga an hriat thu a sawi a, an sorkar leh a nih chuan Assam Rifles-te Aizawl laili aṭanga sawn chhuak turin hma an lak zel dawn thu a sawi bawk.

Lalruatkima hian October 21, Inrinni khan Aizawl Press Club-ah thuthar thehdarhtute kâwmin, kum 2018-a an manifesto an tihhlawhtlin dan a sawi a; "Kan Manifesto hi 80% vel kan tihlawhtlingin kan hria a, kan tihlawhtlin rih lohte pawh nasa taka hma kan lak meknate a ni hlawm. Kan ti ṭha thawkhat hle a, distinction-ah kan pass," a ti.

MNF manifesto-a tel lo, an president leh chief minister Zoramthanga vision dang - kawng chhawng siam, lei verh leh thil dangte a awm nual tih sawiin Lalruatkima chuan, "Hengahte hian hmalakna kalpui mek zel a ni. Lei verh lian tham tak siam turin DPR peih tawhin tender chhuah a ni tawh a, kawng chhawng pawh Bawngkawn leh Vaivakawnah siam tumin, mithiamte'n an rawn en fo tawh," a ti a, hripui leng vangin an duh anga thil a kal loh thu a sawi.

Aizawl khawpui aṭanga Assam Rifles sawn chhuah chungchangah Ruatkima chuan, nasa taka hmalak a nih thu a sawi a, "Union Home minister Amit Shah Aizawlah rawn kalin April 1, 2023 khan Zokhawsanga an insawnna tur hmun a hawng. AR hi an chhuak hreh em em a, chhuak tura an hotute’n an ti tawh chhungin chhuanlam chhetê tê siamin an la chhuahsan lo a, eng emaw zat chu an insuan tawh. Term tharah nasa taka nawr a ni ang," a ti.

MNF adviser Lalruatkima chuan, MNF kaihhruai sorkarin an thawk ṭha thawkhat tih sawiin, "Pathian leh mipui zarah MNF hian sorkarna kan chang leh ngeiin kan ring a, hri léngte a ziaawm chho zel ang a, nasa lehzualin mipui rawng kan báwl thei ngei ang tih kan beisei," a ti.

Manifesto-a 'Kawlphetha (hydro/solar/renewable energy) siam chhuah lamah ṭan lak a ni ang a, district headquarters zawng zawng solar city/town-ah siam tuma hmalak a ni ang' tih chungchangah, 'Megawatt 20 pe chhuak thei Vankal Solar Park hawn a ni tawh' tih a ni. Power chungchanga zawhna chhangin Ruatkima chuan, "Tuirini Hydel Project puitlin hram kan duh a, Power Minister phei chuan state project-a tih mai a rawt a, la bawhzui mek zel a ni. Tuivai pawh bawhzui zel a ni," a ti a; hydel project chu kum 10 chhung buaipui a ngai tlangpui niin a sawi.

Press conference zawha NE Live-in an kawmnaah Lalruatkima chuan, SEDP hnuaiah Rs 3,00,000 sem an tiam loh thu a sawi a, "SEDP beneficiary-te hnenah Rs 3,00,000 sem kan tiam lo. SEDP hi MNF party economic policy a ni a, Covid-19 avangin harsatna tam tak kan tâwk a, ramri chungchangah leh ram kâng vangin harsatna kan tâwk a ni," a ti.

LALRUATKIMA SAWI ṬHENKHAT

* Ramri-ah hmasawnna hna nasa takin kalpui a ni a, sawi mai sen loh khawpin MNF sorkar hian ramriah development a kalpui. Ramri min chhuhsak tumtute lakah silai hial hmeh puah a nihzia pawh kan hriat vek kha. MNF sorkar hian ramria kan hmalaknate hi kan chhuang khawp mai.

* SEDP hmangin infrastructure ṭhahnem tak siam a ni. Family oriented SEDP hnuaiah first phase-ah chhungkaw 60,000 hnenah Rs 50,000 ṭheuh pek a ni tawh a, second phase-ah chhungkaw 60,000 hnenah vek Rs 25,000 ṭheuh pek leh niin third phase-ah chhungkaw 60,000 tho target-in, selection neih mek a ni a, inthlan puanin a nang ta rih.

* Mizorama lei hnuai hausakna (oil leh gas) hai chhuah tumin hmalak mek zel a ni.

* MNF sorkar laia bul ṭan tawh, Mizoram State Health Care Scheme changtlung taka kalpui zui a ni a, sum harsatna avangin duhthusam erawh chuan kan kalpui thei lo.

* Mipui ni tin mamawh tui, electric, gas, buhfaite awlsam zawka kan lei theihna turin hmalakna a ṭha thawkhat hle tih kan hre tlang vek awm e. AAY hnenah chini thla tin kg. 1 sem ṭhin a ni bawk.

* Khawpuia cheng, in hmun nei lote tan Mualpui leh Chêkbâwk house site plan-ah ram mi 464 hnenah pek a ni.

* Sikul ṭhahnem tak sak niin, ṭhahnem tak thawm ṭhat a ni a, sikul ṭhahnem tak dinhmun chawisan a ni. SEDP teacher sang chuang lâk a ni bawk.