MNF-in SEDP hmangin Zoram mipui chiang takin min bum - ZPM

ZPM general secretary Eddy Zosangliana Colney chuan October 21, Inrinni khan Aizawl Press Club-ah thuthar thehdarhtute a kâwm a; MNF kaihhruai sorkar chu kum 2018 inthlanpui dawna an intiamna hrang hrangah an hlawhchham nia sawiin, MNF chu SEDP hmanga mipui bumah a puh.

Eddy Zosangliana Colney chuan, MNF president-in kum 2018 inthlan dawnah an policy pui ber SEDP hnuaiah chhung tin hnena Rs 3,00,000 pek a tiam a, NLUP dawng tawhte pawhin an dawn leh vek tur thu a sawi tih a sawi a; SEDP hnuaia ṭanpuina a taka an pek chu Rs 25,000 a ni tih sawiin, "Inthlan dawn hnaiah, election oriented tih hriat ngawih ngawihin an sem hram a, MNF hian SEDP hmangin Zoram mipui chiang takin min bum a ni. Hetiang aia nasaa inbum leh chuan ngaihna hi a awm tawh lo," a ti.

SEDP-ah an hlawhchham avangin kumin 2023 inthlan turah chuan MNF-in policy mumal sawi tur an nei ngam lo nia sawiin, "ZPM leh ZPM leader Pu Lalduhoma beih chu an policy pui ber a ni ta ringawt mai," a ti a; kawng chhâwng, lei verh, traffic jam awm lohna khawpui siam tihte chu a hlawhtlin loh vek thu a sawi.

ZPM General Secretary chuan, 2023 inthlan turah MNF chu candidate turah an buai hle nia sawiin, minister ṭhenkhatin an bànsan thu leh an vice president Vanlalzawma leh minister Lalchamliana te pawh an din ngam tawh loh thu a sawi a, "MNF tlinna tur bial han ngaihtuah vang vang pawh hian a váng hle a, Aizawl bial 11-ah phei hi chuan an artelukàwn hial a rinawm," a ti.

Eddy Zosangliana chuan, tun inthlana an khingpui ber tur chu MNF an nih dawn thu leh, kum 2028 inthlanah chuan Congress party chu an khingpui lian ber tur a nih a rinawm thu a sawi a; ZPM candidate-te chu eiru lo tura intiam vek an nih thu sawiin, "ZPM Leader hian a unaute pawisa a kawlsak ve mai mai dawn lo. Pu Lalduhoma kaihhruaina hnuaiah mipui sorkar din a ni ang a, party bil induhsakna a bo ang a, Mizoram kan thlak danglam dawn a ni," a ti bawk.

ZPM GENERAL SECRETARY SAWI DANGTE

* Dan lo a sumdawnna kuhva ro smuggling vawiin thlenga titawp thei lo sorkar hi Mizo mipui tan rin thar leh thut nachhan tur a awm lo.

* MNF sorkar apianga dan phal loha sumdawnna a hluar ṭhin leh damdawi ruih theih hluar ṭhin hi dan rorelnain awmzia a neih loh ṭhin vang a ni.

* Kamrula, Abu Mazumdar-te lâr em emna sorkar hi sorkar ṭha, rintlak, mipui tana innghahna tling a ni thei lo.

* MNF sorkar tirha ring taka an tlangaupui mau chungchang chu term tawp dawn lamah an sawi ri ngam tawh lo. Mau vanga thla tin Rs 5,000 la lut an awm em? IAS bànsan an awm em? Ram hi mumang leh duhthusam thámral leh mai mai tur nena hruai chi a ni lo.

* MNF sorkar tirhin sorkar hmasa sum hman bâng chhawmin, ring takin khuang an vua a, term tàwp lamah meuh chuan a pûk theih zawng zawng pûkin, a báin min kalpui thei ngawr ngawr chauh. Sorkar hnathawkin a hunah hlawh an la thei lo a, pension, healthcare leh contractor bill an batsak ṭén ṭún a, tar chàwmna thlengin an pe hlei thei lo. India rama state zinga leiba ngah berah min chhuah thei ṭâwk a ni.