College zirlai harsate chawi kanna tur Mizoramin cheng nuai 225 hmu tawh
Mizoram sorkar chuan, college zirlai harsate chawi kanna tur 'Equity Initiative' atana hman tur sum sorkar laipui aṭangin first instalment cheng nuai 225 a hmu tawh. Finance department-in zirlaite hnena sum pe chhuaktu tur Rashtriya Uchchatar Shiksha Abhiyan (RUSA) hnenah a la pe chhuak lo thung.
RUSA hotute sawi danin, Equity Initiative hi sorkar laipuiin college zirlaite zinga rethei leh harsa zualte chawikanna tura a tih a ni a; first instalment-ah cheng nuai 225 hmuh niin, Mizoram sor-kar chuan December 2015 khan Central aṭangin a hmu tawh. Sumte chu Mizorama college 24-ah pek tur niin, college pakhatin Rs. 9,37,500 zel an chang dawn a ni.
Mizoram sorkarin a lo do lêtna tur (state matching share) pawh kar kal ta khan Planning department chuan plan allocation a siam a, a vaiin cheng nuai 351.88 a ni. Sum hi Finance de-part-ment-in sorkar sum kalphung anga a pek chhuah hunah hman theih a ni ang.
RUSA hotute chuan, Mizo-ram RUSA chuan Equity Initiative atan 12th Plan, kum 2012-2017 chhungin sorkar laipui aṭangin cheng nuai 500 a dawng tih an sawi a; Equity Initiative atana hman tur sumte chu zirlai harsate chawikanna tur a nih rualin, pawisa faia pek kher tur a ni lo tih an sawi bawk.
College zirlai zinga dinhmun harsa zualte'n English leh Hindi an thiam zual theih nana hman tur a ni a; college-a an zirlai pangngai bakah, 'remedial coaching class' atan te, English leh Hindi zir belhna atan te, hmeichhe dinhmun chawikanna leh vohbikte en hniam an nih lohna tura inzirtirna atante hman tur a ni.
Hetih lai hian, Mizorama college 21 tihchangtlunna tura sorkar laipuiin sum a rawn pek chu July 17, 2015 khan sorkarin RUSA hnena a hlan a, RUSA thuneitute pawhin college hrang hrangah cheng nuai 12.5 ṭheuhin an sem chhuak tawh.
RUSA aṭanga sum hmuh chu college-te chuan bungrua leh hmanraw hrang hrang - leh-khabu, projector, steel almirah, dawhkan, chair, water filter, white board, sound system leh ṭul pawimawhte lei nan an hmang hlawm a; college lamin sum an hmang
ṭha hle niin an sawi.
RUSA hotute chuan, Mizo-ram Engineering College, Lung-lei Pukpuia dinna atan sorkar laipuiin 12th Plan chhung atan cheng nuai 2600 an rawn pe dawn tih sawiin, "Heta ṭang hian first instalment-ah cheng nuai 1170 an rawn pe tawh," an ti.
RUSA hotute chuan, Mizo-ram Engineering College dinna tur sum nuai 1170 chu Finance lamin a la pek chhuah loh thu leh state matching share pawh Mizoram sorkarin a la pek loh thu an sawi a; sum chu Finance-in RUSA State Higher Education account-ah dah thuai se an duh thu an sawi.
RUSA kaihhruaina ang chuan, sorkar laipui aṭanga sum rawn pekte chu Central-in a sanction ni aṭanga ni 15 chhungin state sorkarin RUSA account-ah a dah tur a ni a, RUSA pawhin sum an dawn aṭanga ni 15 chhungin a hmangtu turte hnenah an pe bawk tur a ni. Inkaihhruaina hi state sorkarin a zawm loh chuan sum chawi theih a ni.