13th FC sum hmanga Kolasib district-a V/C-te hnathawh MLA-te'n an endik

Mizoram Legislative Assembly hnuaia committee péng pakhat, Committee on Local Fund Accounts (CoLFA) chuan nimin khan an chair-man John Siamkunga hoin Kolasib district-a 13th Finance Commission sum hmanga hnathawhte an endik.

John Siamkunga chuan, Ac-counts & Treasuries department hnuaia Local Audit Fund-te'n tual-chhunga roreltu - village council, local council leh a dangte sum hman dan felhlel leh enchian ngai nia audit findings-a tarlante a hmun ngeia enfiah leh zir chiang tura feh chhuak an nih thu a sawi.

Thil tihsual hailan emaw, tihdik loh laite chhui tura kal a nih loh thu sawiin, Siamkunga chuan, "Hmasawnna leh mipui rawngbawlna atan sum, tualchhung roreltute hnenah pek a nih dan leh a hman dan tur ang taka hman a ni em tih en chiang tur leh, audit findings-a tarlante a hmuna finfiah tura kal kan ni," a ti.

Committee on Local Fund Account hian Lungdai, Kawnpui-I, Kawnpui-II, Thingdawl leh Kolasib khaw chhunga V/C hrang hrangte'n 13th Finance Commission aṭanga sum hmuh aṭanga solar street light bun leh step, lungrem, footpath, kawr leh hna an thawhte an endik a ni.

Committee member-te chuan, hna hrang hrang an enkualte V/C-te'n ṭha taka an siam leh felfai taka an zo fel thei chu lawmawm an tih thu an sawi. Remchang zawk vanga hmun ṭhenkhata street light an sawn chu an hriatthiam rualin, nakin zelah thil a felfai zawk nan sawn a nih chhan ziakin thuneitute hriattir turin V/C-te chu thurawn an pe.

Hnathawh endiknaah hian chair-man John Siamkunga bakah, Vanlalzawma, R Vanlalvena, Lal-rinawma leh Vanlalawmpuii Chawngthu-te an kal a ni.