Police kutthlaktua puh zinga paruk Central Jail-ah dah luh an ni

February 20, 2016 zan zanlai pelh hnua Bungkawna police patrol duty pahnih khawih rawntua puh mi pasarih zinga paruk chu Court thu angin Central Jail-ah dah an ni a, pakhat chungchang erawh vawiinah ngaihtuah a ni ang.

Police-te chuan, police kutthlaknaa inhnamhnawih lo nia an hriat avangin Lalrinzuala s/o Thangzikpuia, Bungkawn chu an chhuah. Inhnamhnawih nia hriat thar Vanhmingmawia (38) s/o Lalkima, Bungkawn an man belh thung. Central Jail-a dah luh tak loh hi Lalruatfela Sailo a ni a; sorkar hnathawk a nih avanga Court-in February 22-a bail-a a chhuah hnuah police-te'n thubuai dang siamsakin an man leh a ni.

Thu dawn danin, police-te lo khawih rawntua puh mi pasarihte chu police-in an dil angin Court-in darkar 72 kawl a phalsak a; mahse, Lalruatfela Sailo chu bail a dil angin chief judicial magistrate R Vanlalchami'n Thawhṭanni khan bail-a chhuah a phalsak a ni.

Bail-a chhuah tak hi sorkar hnathawk a ni a, bail an dilnaah hian a thawhnaa Chief Medical Officer (CMO) chuan ani tel lo chuan an project kalpui mek pakhat chu kalpui theih a nih loh thu Court-ah a thlen bakah, darkar 48 police-in an kawl chuan suspend theih a nih thu tarlan a ni.

Lalruatfela Sailo hi bail-a chhuah ni mah se, police-te chuan zu ruih thubuai siamsak lehin, Thawhṭanni vêk khan an man leh nghal a, nimin khan mi dang paruk nen Court-ah hruai an ni.

Nimina Court-a hruai an nih lai hian Chief Judicial Magistrate a awm loh avangin Court dangah hruai an ni a, Court chuan mi paruk chu Central Jail-a dah turin a ti. CJM-in bail a lo pek tawh Lalruatfela Sailo chungchangah erawh chuan CJM a awm loh chuan thutlukna a siam thei lo a, police-te kawl rih turin a ti a ni.