CM-in ramri vengtute a tlawh

Chief minister Zoramthanga chuan nimin khan Asam lam dep hmun hrang hranga ramri vengtute a tlawh a, Mizoram pum him theihna tura an inpekna ropui a tih thu a hrilh. CM hi Kolasib bialtu MLA K Lalrinliana leh Serlui bialtu MLA Lalrinsanga Ralte ten an ṭawiawm a ni.

Chief Minister chuan, tun hnaiah state páwn aṭangin Mizoram mi leh sa tangkhang lo hawte avangin Bairabi khuain an hah phah thu leh Vairengte chu bungraw châwk luhna luhká ber a nih avangin duty-te an hah hle tih a hriatpui thu a sawi a, "Volunteer duty-te hi ram dang tan pawha entawntlak, sorkar laipuia hotute lakah pawh ka chhuan ṭhin an ni," a ti a; khawtlang mipuite'n mamawh an neihte chu hriatpuiin, a remchan dan ang zela ûm zui a nih tur thu a sawi.

CM Zoramthanga hian Bairabi, Zophai, Phaisen leh Vairengtea Covid-19 vanga duty-na hmunte a tlawh a; CM relief fund aṭangin Bairabi Joint VC hnena Rs. 20,000 leh silpauline paruk; Vairengte Joint VC hnenah Rs. 40,000, silpauline pariat, hand sanitizer litre 20, hmai tuamna 100 leh kutkawr 100; Zophai leh Phaisen police outpost-a duty-te hnenah Rs. 10,000 ve ve leh silpauline; Kolasib DC hnenah Rs. 20000, hmaituamna 100, kutkawr 100 leh hand sanitizer litre 20 a hlan.

Chief Minister hian Kolasib district-a kawng siamṭhat ngaite a enfiah nghal a; Kolasib Circuit House-a DC leh khaw­tlang hruaitute a kawmnaah mipui mamawh bungrua kan phurh luhnaah kawng chhia vanga harsatna lian Mizoramin a tawh loh nan ṭan lak a ṭul thu sawiin, "Harsatna kan tawh loh nan fûrpui thlen hmain a chhe zual lai siamṭhat ngaite a remchan dan anga siam nghal thuai a pawimawh," a ti.

Bairabi khaw luhna lei (bridge) siamṭhat mek leh Bairabi by-pass road (Bairabi khua hêla rail station panna kawng) pawh an enfiah nghal a ni. Bairabi by-pass road hi kum 1998-a siam niin, FCI kudam aṭanga buhfai leh thil dangte phurh chhuahna atan hman a ni ṭhin. Chu kawng chu NH-154 kawngpui siam zawh a nih hnuah hluihlâwn a ni a, tun hnaiah Covid-­19 vanga mihring leh bungraw phur lirtheite'n Bairabi khaw chhung lut loa an kal theihna remchang atan tih niin, a chhe zual laite hnawhin hman ṭan leh tawh a ni.